الحزم بحب
 

اضربيها خليها تتعلم الأدب وتسكت ايه الدلع المرء ده
خلاص يا ماما جيجي هتسكت
خلاص بقي يا جيجي فرجتي علينا السوبر ماركت كله
ماليش دعوه عاوزه العروسه اللى شعرها جولد عااااااااااا

موقف بيتكرر مع امهات كتير
وجمله أوقات بتسمعيها كتير من اللى حواليكي وبتحسسك انك عندك مشكله كبييييره فى تربية بنتك وبتربيها غلط ولازم تدوري على طريقه جديده او تسمعي الكلام ده

وده اللى قالته جدت بنوته عمرها 3 سنين لمامة البنت دي لما كانت عامله شقاوة فى السوبر ماركت قبل العيد اللى فات

الغريبه ان الأم أبهرتني برد فعلها الواعي والحكيم لما شالت بنتها وقالتلها بكل

هدوء وحب وحزم

أنتِ اللى أخترتي تقعدي فى العربية لغاية ما نوصل عند الكاشير

وحطتلها عصير ولعبتين وقالتلها
لعبك عاوزين يقعدوا معاكي وسعلهم مكان جمبك

ورغم عياط واعتراض البنت لكن الأم صممت على موقفها وقالت
احنا فاضل لنا البطيخه اللى انتِ عاوزاها تختاري تقعدي هاديه تلعبي مع عروستك لغاية ما نجبها ولا نمشي حالاً زي المره اللى فاتت

والغريبه ان البنت سكتت وبدأت تلعب بعروستها وتشربها عصير

رغم أن الموقف ده مخدش تالت أربع دقايق بس نقدر نتعلم منه ان

📌الإختيارات
📌والحزم الممزوج بالحب والهدوء
من الادوات الفعاله
📌كمان فيه طرق فعاله كتير غير الضرب والعصبيه نقدر نحافظ بيها على اعصابنا وصحة بناتنا النفسيةوكمان نحل بيها بعض المشاكل بس نجرب
📌أنتِ أكتر حد عارف مفتاح بنته وعارف ايه اللى ممكن يجيب معاها نتيجه أو لأ

رد: الحزم بحب
 

رد: الحزم بحب