لكل يوم زوّادة: لبنان موجوع

ما بقي فنّان ما غنّى للبنان، ما بقي كاتب و أديب و صحافي ما كتب عن لبنان، ما بقي بابا فاتيكان ما حبّ و صلّى و حكي عن لبنان، بالكتاب المقدّس لبنان مذكور، العدرا و يسوع إجو عا لبنان، قدّيسين كتار طلعوا من هالبلد...
بالسما و عالأرض قيمتو محفوظة إلّا فيه... لبنان موجوع، ولادو عم يفلّو، و الباقيين فيه جوعانين بلا أكل، بردانين بلا دفى و مرضى بلا دوا و فقرا بلا أقل مقوّمات الحياة، إقتصادو منهار، ليرتو بلا قيمة، مستشفياتو بس للأغنياء، طبيعتو ملوّثة، جبالو محروقة، ثرواتو مسروقة، طرقاتو فاضية...منعتذر منّك يا عيد الإستقلال انّك جيت و لقيت وطن أبطال ال1943 بهالحالة... تَعو كل واحد مِنّا وين ما كان يضوّي شمعة عا نيّة هالوطن و يصلّيلو عا طريقتو حتّى تحِلّ بركة الرب عليه و على سكّانو و يرجع احلى من ما كان!