منتدى الفرح المسيحى - ليه زوجة واحدة في المسيحية

https://upload.chjoy.com/uploads/163563570624561.jpg

لما بنيجي نفتح سفر التكوين،
أول أسفار الكتاب المقدس..
بنلاقي إن الله خلق الإنسان ذكر وأنثى ✌️
وباركهم وأمرهم إنهم يثمروا ويكثروا ويملأوا الأرض،
نفهم من الكلام ده إن مشيئة الله للبشرية
إن الزواج يكون بين رجل واحد وامرأة واحدة..
وده اللي أكده السيد المسيح
في تعاليمه في العهد الجديد..
إنه من بداية الخلق الزواج عبارة عن
ارتباط بين زوج وزوجة واحدة فقط،
وشدد إن مبدأ تعدد الزوجات مرفوض عند الله تماماً..
وده لأن في الزواج المسيحي
بيحصل وحدة بين الزوج والزوجة،
بيبقوا الاتنين جسد واحد.. مش جسدين!
زي ما قال موسى النبي
وأكد السيد المسيح على كلامه في العهد الجديد..
"منْ أَجْلِ هذَا يَتْرُكُ الرَّجُلُ أَبَاهُ وَأُمَّهُ وَيَلْتَصِقُ بِامْرَأَتِهِ،
وَيَكُونُ الاثْنَانِ جَسَدًا وَاحِدًا.
إِذًا لَيْسَا بَعْدُ اثْنَيْنِ بَلْ جَسَدٌ وَاحِدٌ.
فَالَّذِي جَمَعَهُ اللهُ لاَ يُفَرِّقُهُ إِنْسَانٌ" (مت19: 5-6).
نفهم من كده إنه في الزواج
بيحصل رباط مُقدس بين الراجل والست..
وده لأن الله هو اللي بيجمعهم مش البشر،
وهدف الرباط ده إنه يعكس شكل العلاقة بين الله والإنسان،
زي ما الله أحب الإنسان..
وارتبط بيه ومش ممكن يتخلى عنه..
لازم الزوج هو كمان يحب زوجته ويرتبط بيها أبدياً..
علشان كده الزواج بحسب فكر الله..
مش مشروع اجتماعي، لكنه مشروع إلهي..
الله بنفسه هو اللي أسسه وهو اللي بيباركه. ❤
🙂