لكل يوم زوّادة: كل هالخيطان إنتو بتتحكّموا فيها

غمضو عيونكن و تخايلو معنا هالمشهد. انتو بالنصّ و كل الأشخاص اللي موجودين او انوَجدو بيوم بحياتكن حولكن كل واحد عا مسافة منكن غير عن التاني و مربوطين فيكن بخيطان. كل ما كان الخيط أَسْمَك كل ما كانت العلاقة اقوى...و شو في خيطان عا كتر كبر المسافة انقطشت و وجّعت و شو في خيطان معركجة عا قد ما العلاقات معقّدة و شو في خيطان سميكة و قويّة و ماكنة بتربطنا بناس هنّي من اساسات حياتنا. و في خيطان بتحسها هادية عا آخر نفس بين ثانية و ثانية بتنقطش لأنها اهترت من ورا مواقف و احداث صعبة اذيتنا و في خيطان نحنا فكّيناها بإيدنا قبل ما تلحق توجعنا... و في خيطان صارت مربوطة طلوع من ميلة فينا و من ميلة بالسما و سكّانها... هلّق فتحو عيونكن و تذكّرو انّو الله خلقنا حرّين و انّو كل هالخيطان انتو بتتحكّمو فيها و انتو بتقرّرو شو تخلّو و شو تفكّو و شو نوع الخيط و قدّيش طولو...الله يكون رفيقكن عاطول!