منتدى الفرح المسيحى - وتطأ الشبل والتنين

https://upload.chjoy.com/uploads/163397888678781.jpg

"علَى الأسَدِ والصِّلِّ تطأُ. الشِّبلَ والثُّعبانَ تدوسُ."

الكلمات دي في مزمور ٩١ دايماً مُلهمة ليَّ
وبتحسسني بالقوة والعظمة كدة وبتبث فيا الحماس 🔋
وثقة ويقين في حماية ومعية ربنا
وبعدين فجأة كدة لقيت نفسي مش عارف أيه هو الصِل ده 😂
وبعدين ليه يقول الأسد وبعدين يقول الشبل إذا كان الأتنين واحد🤔

شوف معايا بقى يا سيدي أكتشفت أيه في ترجمات كتير بيقول كدة:
"عَلَى السبع وَالأفعَى تَدُوسُ، وَتَطَأُ الشِبلَ وَالتَّنِّين"

يعني أيه إللي موجود هنا تعابين عادية،🐍
تعابين زي الكوبرا كدة سامة،🐍
وأسد كبير سبع يعني🦁، وأسد صغير شبل.
وعندك كمان واحد تنين 🐉

مُتخيل حجم إللي جاي على كاتب الكلمات دي .
.. لكنه ولا همه عارفين ليه؟ 😎
ببساطة لأنه هو الشخص الساكن في ستر العلي
يعني إللي مخيم ومُقيم في حمى القدير
أزاي هيخاف من كل ده 🥰

أياً كانت مرحلة الوحش إللي مقابله: تعبان كان أو أفعى أو حتى تنين!
أياً كان مرحلة التهديد إللي جاي عليه شبل صغير أو سبع كبير!
عليهم يخطي وعليهم يدوس ... واحدة هليلويا هنا بقى 🤗

صديقي الوعد ده ليا وليك أنك تقدر تدوس على كل سبع يقابلك.
تقدر تخطي كل تنين هيواجك!
بس بشرط واحد بس. أنك تسكن في حماه. أنك تبيت وتخيم في ضله!