لكل يوم زوّادة: ضمان شيخوخة !!!

بيخبرو عن زلمي شاغل كل حياتو و بس صار بعمر التّقاعد حبّ يعمل مشروع زغير يعيش منو لأنو ببلدو ما في ضمان شيخوخة بس المصاري اللّي جمّعن كل حياتو علقو بالبنك. الكبير بدل ما يرتاح و يعوّض عن تعب السّنين بدّو يعتل همّ اذا عاز يتحكّم، بدّو يعتل همّ اذا الطبيب وصفلو دوا يقولولو مقطوع، بدّو يعتل همّ يوقف كل النّهار بصفّ بنزين ما بيخلَص، بدّو يفكّر بمستقبل ولادو، وصل يعتل همّ حتّى شو بدّو ياكل! اجمالًا الكبار بالعمر بيرتاحو، بيحبّو الموسيقى، بيحبّو المشاوير يعني راحة بال! بس اكيد ما كانو عارفين انن رح يضطرّو يضلّو عتلانين هموم من كل الأنواع لآخر حياتن...
عا كل الأحوال ما تزعلوا و تذكّرو انو ربنا بيعطي اصعب معاركو و مهماتو لأقوى جنودو...منصلّي عا نية كل شخص كبر بالعمر حتى ربنا يكون الو ضمان الشيخوخة و الرّفيق و الصّديق و الحامي و الطبيب و مصدر السلام و الأمان!