منتدى الفرح المسيحى - تيجي تشتكي له يشتكي لك

https://upload.chjoy.com/uploads/16309734326661.jpg

تيجي تشتكي له يشتكي لك
من كوارث العلاقات ..

انك تحكي لواحد "مفروض انه صاحبك"
و مستني انه يسمعك و يفهمك و يحس بيك ،
تلاقيه قبل ما تكمل كلامك يطفيك و يقفلك "ما هو يا ما بيحصل كده للناس
" ، و " انا حصلي اكتر منك" ، و يروح ماسك الكلام علي نفسه و يغير دفة الحديث علي مشاكله هو ..

و آه من الوجع اللي بيحصل لما تلاقي اللي قدامك ، اللي بتجري عليه، يسيبك تقع علي جدور رقبتك من الحسرة ، و يستلمك شكاوي ..

يا اخي : شوية مشاعر لحد موجوع و محتاج بس حد يقوله "انا حاسس بيك" ..

مش عارف تعمل كده ؟؟ علي الاقل اسكت و اتفاعل شوية ، و "اعمل نفسك" بتسمع له ، و اجل حكاويك و همومك شوية .. و اهو يبقي نص العمي و لا العمي كله !!

يا قلبك: تكسر بخاطر واحد مهموم و جاي يتحامي فيك و يسمع له منك كلمتين تشجيع ، و بدل ما تعينه تشيله همك ؟؟؟

من فنون الحب و الرحمة انك تسمع و تحس و تتفاعل مع الآم الناس و حكاويهم و همومهم ..

انت كده بتروي نفس عطشانة لنقطة ماء في صحراء جرداء ، و بيتحيي قلب مشرف علي الموت بشوية سمع و حب و مشاعر حلوة ..