منتدى الفرح المسيحى - خبرات من الحياة

https://upload.chjoy.com/uploads/162978695345571.jpg

• في الاوقات اللي في عز منا محتاج للشغل و حواليا ناس أصحاب اعمال يعرفوني كويس
عمري ما قلت لحد من فضلك شغلني .. عشان خاطري .
• في الوقت اللي قدامي فرصة أتصاحب علي شخص مليونير و هيعليني جدا (وهو كان هيرحب)
.. انا رفضت الفكرة لإني ماحستش بأي مشاعر صادقة تجاهه .. أي مشاعر هتكون fake علشان أتملقه .
• في دوائر علاقات زي صداقة او ارتباط او غيره ..
لو كنت فكرت فيها كمكاسب كنت هتنقل نقلة تانية لفوق اوي .
. لكن كنت هفقد مصداقية و مصداقية مشاعري قصاد نفسي .
• في مواقف حرفيا كانت هتعليك طبقيا مقابل شوية مديح علي نفاق علي ترجي
علي اقتحام علي اعتذار مبالغ فيه ، لكن رميت كل ده و اخترت اكون صادق .
مع المواقف دي كلها بيكون جوايا صوتين ، صوت بيقول " برافو" و صوت بيقول " يا عبيط "
. حتي الناس اللي حواليا لما كنت بحكيلهم كانت بتختلف ردود الافعال بنفس الصوتين ..
ناس تقول " برافو " و ناس تقول "يا عبيط"
لكن مع مرور الوقت فيه صوت أعمق بيعلي .. صوت الصدق و العزة والكرامة ..
و تعرف ان فيه حاجات أغلي بكتير من الفلوس والفرص والارتقاء ..
حاجات زي انك تكون بتعبر عن مشاعرك لما يكون ده في قلبك فعلا مش علشان محتاج مصلحة ما .
. حاجات زي انك تحس بكرامتك و عزتك واكتفائك قصاد نفسك ..
حاجات زي انك بتضيف علي شخصيتك رسومات نادرة في السوق زي الخبرة و الحكمة
و التواصل مع الله والإتكال عليه بكامل قلبك .
و الأعظم ان عمر ما الله ما يخليك تندم .. لكن في توقيته يفتح لك ابواب و يبعت لك فرص
وانت معزز و بكرامتك و نزاهتك .. و تختبر ان الحاجة اللي تاخدها بطريقته
و من ايده ليها طعم جميل ومشبع مختلف عن كل حاجة انت بتاخدها بفهلوتك و شطارتك .