منتدى الفرح المسيحى - بين يديه أستودع حياتك

https://upload.chjoy.com/uploads/162800325504921.jpg

السجادة
كنت بنضف السجادة و قلبتها على ضهرها
و أنا بنضفها بدأت أسرح فى شكلها و هى مقلوبة ..

لاقيت مجموعة من الخيوط مجدولة و متشابكة
و متداخلة بشكل عجيب
لاقيت مجموعة من الألوان الباهتة أبيض و أحمر و إسود
كلها الوان ملهاش جمال و لا معنى و لا شكل !!
و حسيت إن هى دى حياتنا هنا على الارض

غزلها النساج الأعظم
و ضفر كل تجربة مع مشكلة و كل تحدى مع إنتصار
و كل نجاح مع فشل و كل مرض مع شفا
زينها كمان بالالوان
الوان الحزن الغامقة مع الوان الفرح الفاتحة, الوان التضحية , و الوان الصمود

و كل الخيوط و الالوان فى النهاية شكلوا حياتنا
صحيح ممكن تكون من ضهرها سيئة و ملخبطة و باهتة و صعبة و متشابكة

لكن النساج البارع بمهارتة عمل منها تحفة فنية , غالية الثمن ,
هيبان جمالها لما تكتمل أيامها , و تتفرش فى السما بساط تحت رجلين المسيح.

سلم حياتك لايد ربنا الامينة يشكلها بحكمته ..
حتى لو منظرها باين ملخبط لكن فى النهاية هتطلع حاجة حلوة قوى .
خليك طيِّع فى إيد ربنا , علشان يغزل من حياتك جمال و مسرة .
و تستحق إن يكون لك مكان فى السما .
خلى مشورته و مشيئته تسبق عقلك المحدود
و بين إيديه أستودع حياتك .