منتدى الفرح المسيحى - تتمدد بالحرارة و تنكمش بالبرودة

https://upload.chjoy.com/uploads/162772981030451.jpg

تتمدد بالحرارة و تنكمش بالبرودة

دي مش بس نظرية في بعض المعادن ، دي بالاولي نظرية "السعادة " ..

لما تلاقي حد ما حدش مهتم بيه ، اجري عليه و شجعه و خللي غيرك يقف جنبه ..

و لما حد يطلب منك طلب ، ابذل كل جهدك تساعده
، و لو ما عرفتش يبقي توصله للي يساعده ،
و لو ما عرفتش خالص يبقي بالتشجيع و زرع الأمل ز السؤال و المتابعة ..

لو ليك أصحاب او معارف او قرايب يبقي تسأل عليهم بزيارة او برسالة او تليفون من غير اي طلبات مهما الحوا عليك انهم يساعدوك : انت بس بتشقر عليهم و تفرحهم ..

لو واحد ناجح افرح له ، و دل الناس عليه علشان يفرحوا له ، و لو واحد رزقه واسع اتمني له الخير بلسانك و بقلبك و بفرحتك ..

لو حد زعلان منك تعال علي نفسك و راضيه
، و لو رفض اهو علي الاقل تبقي بعت له رسالة محبة ، و لو ناس متخاصمة خليك بينهم صانع سلام و واسطة خير و ما تسيبهمش غير لما يتصالحوا..

و لو واحد مكشر او حزين أقف جنبه و خفف عنه بمساعدة او كلمة او جبر خاطر ..

المهم ازرع الفرح في قلوب الناس طول ما انت ماشي
، ح تلاقي قلبك فرح قبل ما هم يفرحوا..

و السعادة بأمانة "بتتمدد" و "تتكاثر"
و "تنتشر" كل ما توزعها ، و ترتد علي قلبك قبل ما تسعد قلوب الناس ..