منتدى الفرح المسيحى - مين فينا مش بيغلط؟؟

*** مين فينا مش بيغلط ***

http://upload.konozalsamaa.com/uploads/13367467931.jpg

مين فينا مبيغلطش
كلنا خطيتنا مبتخلصش
لكن المشكلة إننا مبنغفرش
ولو مين زعلنا مبنعذرش
بنلوم ونجرح ومبنشيلش
غير هموم نفسنا ومبنعرفش
نسامح ونغفر زى ربنا
ولو عملنا كدة منقدرش

ياريت كل واحد فينا زعلان من غيره
يحاول يلتمس العذر ويفتكر جميله
أكيد لو ضايقك مرة معاه تفسيره
ويمكن يكون للصالح ومش لضرر غيره
تعالوا كلنا نصالح إللى مخاصمينه
ونقوله معلش ونحاول نصليله
لو فعلاً هو مش صح الرب يهديه وينيره

لكن بلاش نتكلم عليه بالسوء
وهو ميعرفش حاجة عن كلام مسبوق
بيتقال أو إتقال بإسلوب مسروق

ليه يا جماعة منسامحش زى إلهنا المصلوب
نحب غيرنا ومنجيبش فى سيرة شخص محبوب
يمكن يكون معانا ليه تجربه شوفنا فيها عيوب
ويمكن يكون مع غيرنا طيب ومبيعملش أى ذنوب

مفيش حد فينا معصوم من الغلط كلنا بنى أدمين
بنضايق بعضنا وكلنا بنخبط ونعمل أسافين
مفيش غير حد كامل وهو يسوع إلهنا الأمين
إللى وصانا على المحبة لبعض وقالنا :
إغفروا فى كل حين

بقولكوا إيه لو قريتوا كلامى حاولوا تفهمونى
أنا زيكم فيه وبنقض غيرى وليا عيوبى
بس عايزة أتقف معاكوا تغيروا إسلوبكوا وأغير إسلوبى
كلنا مخطئين فى حق بعض وفى حق الرب صدقونى
وإحنا مش هنحاسب الناس ده مش دوركوا ودورى
الرب هو المسئول إنه يسامح ويغفر ويغير ولا يدين
لإنه قال " لا تدينوا كى لا تدانوا "
وأنا وصلت ليكم عن ربنا مفهومى
هتسمعونى مش عايزين تسمعونى
علقتولى مش عايزين تعلقولى
مش هيهمنى خالص حتى لو إنتقضدونى

بقلم / الشاعرة القبطية
كرستين ميلاد