منتدى الفرح المسيحى - طموحات الشاب المصري !

قريت قصة قصيرة كدة ع النت من فترة بتقول :

سأل أمريكيا مصري : ما هي طموحاتك ؟
رد المصري : أن أجد وظيفة ثابتة ، وأن أتزوج بالفتاة التي أحبها !

فرد الأمريكي : انا أسألك عن طموحاتك ، وليس عن حقوقك !!

ـ

المقولة حلوة واللي بيقراها بيضحك ويسقف :d
بس تعالى طبقها على حياتك كدة كمصري !
هتلاقي انها فعلا صح جدا !

الشاب المصري هو الوحيد اللي بيكون طاير من الفرحة لما يعرف انو قبل ف وظيفة ، مهما كان هيطفح الدم فيها !

انا من اسبوع نزلت شغل ، ومن 3 ايام جالي تليفون لوظيفة تانية بليل ، وشغال الاتنين ، ومن ساعتها وانا يا اما ف الشغل ، يا اما نايم ، يا اما بصلي بشكر ربنا اني اشتغلت ! ، ودي مش اول مرة اضطر فيها اني اشتغل شغلانتين !

فرحان وكأني بروح الاقي فلوس في الشارع !! ، مع اني بطفح الدم ! والوظيفتين مالهمش اي علاقة لا بمجال دراستي ولا باللي بحبه !

شباب كتير اوي زيي !
اعرف شباب بتشتغل 3 شغلانات ! وبينامو 4 ساعات !
الشاب المصري لو بطبيعته الكلام والشكوى ، هيملا الدنيا شكوى
بس لأن طبيعتو السكوت والكتمان ، وأنو فاهم الرجولة انها تحمل وعمل في صمت ، فهو ساكت ويبان عليه انو راضي !

الشاب دة ، فين طموحاته في الدنيا ؟
الشاب اللي بيشتغل عشان يصرف على بيتهم ، او على اخواته ، دة فين طموحه ؟ بلاش طموحه فين حقو انو يتجوز اصلا ويستقر !؟؟

الشاب المصري اغلب من الغلب !
لما بيتسأل عن طموحاتو بيقول الاقي شغل واتجوز !
وميعرفش ان دي حقوقه ، وهو خلطها بكلمة طموح نتيجة لغلبة !

ــ

في البلد دي ، ازاي الشاب دة يتقدم ؟ ازاي يكون له طموح انه يفيد العالم بحاجة !

طموحات الشاب المصري ! صفر !