منتدى الفرح المسيحى - اوعي تبقي يويو

https://upload.chjoy.com/uploads/162239338182911.jpg

فيه ناس يعرفوك لما يحتاجوك، غير كده يبقي لا ليك عندهم عازة و لا لزمة .

و اول ما يلاقولك بديل ، تتركن علي الرف و أحيانا تحت الرف ..

ده فيه اكتر من كده : يمصمصوك و يجيبوا اخرك و ياخدوا اللي عندك ، و اول ما يشبعوا او يلاقوا مصلحتهم مع غيرك ، مش بس ينسوك، ده يرموك و مفيش مانع يدوسوك ..

ده حتي مع ربنا نفسه عملوا كده :
"لأَنَّهُمْ حَوَّلُوا نَحْوِي الْقَفَا لاَ الْوَجْهَ، وَفِي وَقْتِ بَلِيَّتِهِمْ يَقُولُونَ: قُمْ وَخَلِّصْنَا. (إرميا ٢: ٢٧)

الاعجب من كده انهم ممكن يحتاجوا لك تاني بعد ما استغلوك و استغنوا عنك ، و يجوا من غير كسوف و لا حيا ، يطلبوا منك تاني خدمات ، و كأنهم - يا ولداه- ما عملوش حاجة و لا نكروا جميلك !!

و الاغرب لو رفضت تذعن لاستغلالهم من تاني ، يتطاولوا عليك و يطلعوك غلطان لانك رفضت تبقي ملطشتهم ، و يخوفوك و يدوسوا علي ضميرك علشان تعملهم تاني طلباتهم ..

ناس بتعملك "يويو" : لما يستغنوا عنك يهينوك، و لما يحتاجولك بمزاجهم يطلبوك ؛ يعني يحرقوا قلبك و شويتين و يرجعوا يخطبوا ودك لمصلحتهم ، و ماسكينك بخيط يرموك و يشقلبوك و يعذبوك !!

عارف الحل ؟؟

اوعي تبقي لحد "يويو" ، لعبة مريضة في ايد مرضي ..

اخدم الكل و من قلبك بس اوعي حد يستغلك ، ده مش معني الحب ..

اللي بيعمل فيك كده لا حبك و لا ح يحبك ، لا احترمك و لا ح يحترمك ..

و لو سبته يعمل فيك كده ، تبقي علمته يعمل كده مع غيرك ، و اديته دعوة مفتوحة للاستغلال ..

الحب مش ضد عزة النفس و لا الكرامة ..
ما تسمحش لحد يهين كرامتك ؛ حبه و حطه في مكانه الحقيقي : النسيان الحكيم و الاستغناء السليم