منتدى الفرح المسيحى

https://upload.chjoy.com/uploads/162206870708911.jpg

فيه ايام كده لازم تخلص ، و تعدي ..

يسميه الكتاب "اليوم الشرير" : لِكَيْ تَقْدِرُوا أَنْ تُقَاوِمُوا فِي الْيَوْمِ الشِّرِّيرِ (أفسس ٦: ١٣) ..

عامل زي يوم الغارة وقت الحروب ، الشرير يهجم و الاشرار يقفوا ضدك و الشر صوته يعلي ..

تبقي فترة موج و عواصف و اعاصير ورا بعض ؛ كله يتكركب و يتلخبط ، و تحس انها زي "نوة البحر" لما تقوم ، او زلزال عنيف يهز دنيتك ..

لكنه يوم و ح يخلص ..

اثيت و قاوم و انت لابس قوة الله و حمايته (أفسس ٦: ١٣) .. قاوم الفكر اللي بيقولك ان مفيش رجا ، اثبت علي قوة الله ووعده ..
الضلمة ح تزيد لغاية ما تيجي احلك لحظات الليل "الهزيع الرابع" ، و ح تلاقيها فرجت لوحدها ..

ح تلاقي السيد الرب ماشى علي المياه (متي ١٤) ، و ح يصير هدوء عظيم ، و الموج ح يجي تحت قدميك و المركب ح توصل الشط بأمان..

احفظ نفسك هادئة مصلية واثقة ..

و اليوم الشرير لازم ح يعدي ، بعد ما يكون حقق غرضه و علمك الدرس؛ بعد ما يكون ايمانك تشدد و قلبك غلب الخوف ، و ثقتك في الله ارتفعت ، و التجربة نضفت قلبك من اي حقد و كبر و غضب و بعد عن الله " مِنْ أَجْلِ ذلِكَ احْمِلُوا سِلاَحَ اللهِ الْكَامِلَ لِكَيْ تَقْدِرُوا أَنْ تُقَاوِمُوا فِي الْيَوْمِ الشِّرِّيرِ، وَبَعْدَ أَنْ تُتَمِّمُوا كُلَّ شَيْءٍ أَنْ تَثْبُتُوا. (أفسس ٦: ١٣)