منتدى الفرح المسيحى - كفاف و لا وفرة

https://upload.chjoy.com/uploads/162144107849841.jpg

"منهج الكفاية" او " خبزنا كفافنا " يعني الخبز الذي يكفينا و يشبع احتياحاتنا علي القد ، قاعدة ربنا يتبعها معانا ..

و كفايتك من عطاياه هو اللي بيحددها لينا حسب مشاعر ابوته ..

ليه علي القد بالضبط ؟؟

لان مرات كتير الوفرة (زي وفرة الفلوس مثلا ) تضر و تضل و تعمي الإنسان عن نفسه و عن ضميره و بيته و الناس ..

الدليل ؟
"لِئَلاَّ إِذَا أَكَلْتَ وَشَبِعْتَ وَبَنَيْتَ بُيُوتًا جَيِّدَةً وَسَكَنْتَ، وَكَثُرَتْ بَقَرُكَ وَغَنَمُكَ، وَكَثُرَتْ لَكَ الْفِضَّةُ وَالذَّهَبُ، وَكَثُرَ كُلُّ مَا لَكَ، يَرْتَفِعُ قَلْبُكَ وَتَنْسَى الرَّبَّ إِلهَكَ (التثنية ٨ : ١٢ -١٤) ..

ده بيحصل مع الاتقياء المخلصين، تلاقي ربنا باعت لهم معونة او سند او شخص يؤدي لهم خدمة و دور محدد ، و خلاص ..
زي غراب ايليا اللي ربنا بعته وقت المجاعة معاه اكل ، و لما خلصت المجاعة ما شافش الغراب تاني ..

و ده علشان نبقي دايما واثقين فيه حكمته ، و نبقي شاكرين و راضيين ، و واثقين ان كل ما نحتاج ح يبعت تاني بطريق تاني ..

فيه بقي مرات تانية ربنا يتبع "منهح الوفرة"

فَيَكُونُ أَمَانُ أَوْقَاتِكَ وَفْرَةَ خَلاَصٍ وَحِكْمَةٍ وَمَعْرِفَةٍ (إشعياء ٣٣: ٦)

وَالْقَادِرُ أَنْ يَفْعَلَ فَوْقَ كُلِّ شَيْءٍ، أَكْثَرَ جِدًّا مِمَّا نَطْلُبُ أَوْ نَفْتَكِرُ (أفسس ٣: ٢٠) ..

هنا حكمة مختلفة ؛ فيض ووفرة لان ربنا عارف انك في الوقت ده عاوز حنان و امان و طبطبة تناسب حالتك النفسية و الروحية و الجسدية .. هنا يغير ربنا منهجه لانه عارف انك محتاج ده في الوقت ده بالذات ، و ان الوفرة دوا و شفا لقلقك و خوفك، زي الكفاف ما يبيقي دوا و شفا في اوقات تانية يعلمك فيه الرضي و الشكر و التسليم ..

و من منهج الكفاف لمنهح الوفرة مسيرتنا مع الله مضمونة و متأمنة تحت مظلة حكمته و رعايته و أمانته و ابوته ..

في كل الأحوال سيبه يبعت لك ، و اشكره علي اللي له بيبعته..