منتدى الفرح المسيحى - خاسر الناس و رابح الناس

https://upload.chjoy.com/uploads/162034189197381.jpg

خاسر الناس و رابح الناس ..
رَابحُ النُّفُوسِ حَكِيمٌ. (الأمثال ١١: ٣٠) ،
و بالمثل خاسر النفوس احمق ..
و للاسف الشديد كتير من العلاقات انعدمت و انهدمت بسبب (كل عفوي) حماقة التصرفات و الكلمات ..
كل مشكلة لو دورت وراها تسبب فيها اندفاع و تسرع في الكلام ، و غضب و هجوم و تعالي ..
و الغلط بيكبر كل ما يكبر قائله و مستقبله..
يعني ايه ؟؟
يعني لو انت كبير سنا او مقاما (مع تقديري للكل ) غلطك بيتضاعف ،
و لو غلطت في واحد كبير سنا او مقاما غلطك برضه بيتضاعف ..
ممكن كلمتين مندفعين يتسببوا لك في عداوة مع ناس تعيش لك عمر طويل
، و تدفع تمنها غالي ، و حتي الاعتذار ممكن ما ينفعش مع كتير منهم ..
و كل الناس عندها كرامة و عزة نفس ، و كتير منهم "ميتهم ما بيندفنش " ،
يشيلوا في قلبهم مرار ناحيتك العمر كله بسبب كام كلمة جرحتهم بيها ..
خللي أخلاقك حلوة ، و كلماتك عذبة و ردودك مهذبة و رقيقة ، و تعبيراتك كلها تقدير و احترام ..
اوعي في غضبك تتكلم او تجرح او تهين ، لان اللبن لما بيتعكر ما بيصفاش بسهولة و أحيانا ما بيصفاش خالص ..
و صدقني انت في غني عن عداوات تصنعها لنفسك ، و علي رأي المثل (عفوا) "هي المشرحة ناقصة قتلى" ..
ياما ناس لسانها ضيعها و صغرها ، و ياما ناس لسانها انقذها و أسعدها و كبرها و كسبها ..
يارب يعلمك تكسب الكل، و يخلي في فمك جوهرة و في لسانك سكرة ..