منتدى الفرح المسيحى - من غير مشاعر

https://upload.chjoy.com/uploads/161870128702081.jpg

ما بقتش مصدق ..

فيه ناس بند المشاعر مش معموله داون لود في السوفت وير بتاعها !!

ممكن اتربت علي كده ، او من كتر ما شافت
من قسوة الدنيا عليها قسيت علي نفسها و علي غيرها..

ممكن كمان لان جواها ضلمة و عدم صلح مع النفس
، ففقدت نعمة السلام و الهدوء ، و غرقت في دوامة من الحرمان
، و فقدت قدرتها علي الحب و العطف و الطيبة ..

الناس دي سبب قلق للي حواليها بسبب جمود قلبها و لسانها و قسوة تعبيراتها و صعوبة التواصل معاها ..

ناس مطرح ما تروح تعمل مشاكل و منين ما تتكلم تعمل متاعب..

ناس لا بتحس بحد و لا تعرف الحب اللي اتحرمت منه ..

ناس عاوزة واحد بدرجة "طبيب
" شاطر في النفس الإنسانية يعرف يداوي جراح الناس دي
.. يحتويها، و يطبطب و يتفهم و يقدم حب لقلوبهم العطشانة سلام و تقدير ..

انا عارف ان فيه نفوس ما لهاش حل ..
ناس حطة اقفال علي قلبها ما لهاش مفاتيح..

حاول معاهم و حاول كتير، بالصلاة و طولة البال ،
ح تفتحهم بطيبة قلبك و صبرك ..

و اوعي تقطع الأمل في حد ..
لكن لو هو صمم علي استمرار رفض كل محاولة شفا ،
يبقي هو اللي يتحمل و يدفع تمن جفاه..

و ساعتها لما تبعد عنه ، ابقي صلي له
و سيبه لربنا يعمل اللي ما تقدرش تعمله ..