منتدى الفرح المسيحى

https://upload.chjoy.com/uploads/161201932293911.jpg

فن التفاهة

ده فن للاسف يتقنه ناس كتير ، بيداروا بيه سطحية تفكيرهم و ضآلة عقلهم و ضحالة أفكارهم ..

فن ملخصه انك تيجي في "الهايفة" و تتصدر !!

من الهيافة انك تتكلم في مواضيع ما تعرفش عنها حاجة و تفتي علشان تبان "مثثف" و "عالم ببواطن الامور" ..

من الهيافة برضه أنك تتكلم عن نفسك و نجاحاتك الوهمية و اللي ما تهمش حد غيرك ، و "تاكل القعدة لحسابك" .. كل ده بيحصل و انت فاكر ان الناس مشدودة ليك و هما من جواهم "بيضحكوا علي سطحيتك" ..

و من الهيافة انك تقول "انت مش عارف أنا مين " ،
و انت في الحقيقة عارف انك "فاضي" من جوه ،
و ان الانسان المليان بأعماله و أخلاقه و تواضعه و خدمته للناس مش بصوته العالي و لا بتعاليه أو بسوء لسانه..

من الهيافة كمان الاستعراض باللبس أو الزينة أو الممتلكات
، و انك تبقي حياتك في شوية مظاهر حاطط فيهم قيمتك..
و مش واخد بالك ان الناس شايفاك "قليل" ،
و عارفة ان الكبير كبير بعقله و حسن أخلاقه و مدي حبه للناس ..

الهيافة درجات ، لكن لو لقيته بقي عند واحد "فن" ابعد عنه ،
لحسن يعديك و يعييك و يقل بيك !!