منتدى الفرح المسيحى - كلمة السر "فوت"

https://upload.chjoy.com/uploads/161091338087791.jpg

كلمة السر "فوت"

كلمة احفظها كويس لانها المفتاح "الماستر" اللي يفتح اي باب معصلج..

حد قالك كلمة بسيطة بس ضايقتك ، احسبها كويس قبل ما تتقمص أو تعاتب أو تقاطع.
. فيه كلام تافه بيطلع وقت الزعل و كتر النبش فيه يزود الخلاف ..
يبقي الحل : "فوت" ، عدي زعلك ، و اهدي و عيد التفكير ..
طبعا لو الامر كبير ح تحتاج وقفة ، لكن في الغالب ح تلاقي الموضوع ما يستاهلش .
يبقي الحل اهدي و فوت و عدي زعلك و عيد حساباتك و روق قلبك و بالك ،
ح تلاقي الموضوع خلص ببساطة..

دخلت في مناقشة و احتد النقاش و القعدة سخنت و لقيت اللي قدامك بيعيد و يزيد
و غضبان من غير اي سبب واضح..
يبقي برضه "تفوت" .. خفف الكلام و ما تناطحش أو تجادل و تولع الدنيا .
اهدي و استهدي و كام كلمة حلوة علي ضحكة لطيفة و تطلع متصالح و متراضي ..

بتشتري أو بتبيع ، و لقيت الكلام علي فلوس بسيطة ما تستاهلش ،
و الموضوع مش مستحمل كل الوقت و الجدال ده ..
هنا برضه تفوت و تخلي الموضوع يمشي بسلاسة ، و حبة عليك و تطلع كبير و مرتاح
، ابرك من كل الجدال و الفصال ده ..

الكبير في العلاقات و المناقشات هو اللي بيعرف امتي يقف و يدي للمواضيع حجمها و امتي يعدي الأمور ..

و ح تكتشف معايا أن أغلبية مشاكلك و صراعاتك أن ما كانش كلها تخلص بكلمة السر دي : "فوت