منتدى الفرح المسيحى - متدين ممارس و متدين تقي

https://upload.chjoy.com/uploads/16107429582851.jpg

هل بكترة ممارسات التدين انصلح حال الناس و الدنيا ؟؟

لو كده يبقي نخلي الصلاة ليل و نهار و الصوم طول السنة و أفعال الخير لا تنقطع ..

لكن الحقيقة أن الناس اشتغلت التدين "الأسهل نوعا" عن الإصلاح الحقيقي للقلوب ..

ان كان علي الصلاة عاوزة مجهود بسيط ، ممكن ترددها بلسانك
، و ممكن تمثل قدام الناس انك "كبير الاتقياء" ، لكن الأمانة و المعاملة الحسنة
و المحبة و التسامح و التواضع عاوز جهد و جهاد صعب جدا ، صح ؟؟

الصوم نفس الكلام ، شوية جوع ح تستحملهم كام ساعة
و بعدها تاكل زي ما انت عايز ، و ممكن تضحك علي الناس و تضيع الجوع بالنوم ،
و ممكن تاكل من غير ما حد يشوفك .. لكن التقوي و السماحة
و الوداعة و الصبر و الرضي و الشكر و إكرام الناس
و حسن معاملتهم موضوع كبير قوي عاوز صدق و نقاوة و توبة قلب و صفاء نية ..

علشان كده فيه فرق كبير بين "المتدين الممارس" او "المؤدي"
و "المتدين التقي" عفيف اللسان كريم الأخلاق حلو القلب و العشرة ، جميل الخصال ..

و علشان كده عمر ما "المتدين المؤدي السطحي" عرف يخدع حد ،
و لو خدع يبقي بالكتير كام يوم و أعماله الشريرة تفضحه ..

و علشان كده برضه ربنا عمره ما دعي الناس في عظته الذهبية للعبادة
و بس (الصلاة و الصوم و الصدقة ). ،
إنما حط جنبها "فَلْيُضِئْ نُورُكُمْ هكَذَا قُدَّامَ النَّاسِ،
لِكَيْ يَرَوْا أَعْمَالَكُمُ الْحَسَنَةَ، وَيُمَجِّدُوا أَبَاكُمُ الَّذِي فِي السَّمَاوَاتِ. (متى ٥: ١٦) ..

المتدين السطحي المزيف اللي فهم من تبعية الله شوية أعمال يضحك بيها علي الناس
و علي نفسه هو اردأ مثال للناس و سر عثرتهم و تعبهم..
و استحق مع الكتبة و الفريسيين لقب ممثل (مرائي ) و وقعت عليه الويلات ( راجع متي ٢٣) ..

و المتدين التقي النقي الخدوم الخلوق هو سر سعادة الكون و حب الناس لله و عشقهم للسما ..