منتدى الفرح المسيحى

https://upload.chjoy.com/uploads/16099245785221.jpg

صمتي اعتذار مهذب عن عشرتك ..

صمتي رسالة من قلب حساس و حساس قوي،
حاول يكلمك مرة و مرات فاتصدم في ردك القاسي
و مشاعرك الناشفة، و تجاهلك المؤلم..

صمتي دهشة من لطفك العجيب مع اللي ليك معاهم مصالح
، و تجاهلك الشديد معايا
، و انا اللي كنت فاكر انك محبتنا فوق كل مصالح ..

صمتي رسالة ، عارف انها اصلا مش ح توصلك ،
لأنى لو فارق معاك كنت من الأول ما جرحتنيش
و لا هانت عليك مشاعري .. او علي الاقل لما حسيت
اني بعدت و سكت و اتغيرت أو حتي قلت لك "اول كلمة عتاب"
كنت راضيتني و لو بكلمتين، و انا كنت ح انسي لك اي قساوة ..

صمتي ليك رسالة باعفيك فيها منى ،
من وجودي في حياتك ؛ قررت فيها اني لا استجدي منك الرضي
و الشفقة .. فيها قررت انسحب بعد ما كل محاولاتي ماتت عند ابوابك ..

اوعي تفتكر اني باعاقبك، انا اللي موجوع قبلك و اكتر منك و انا كل ما باشوفك بألجّم لساني اللي اتكلم معاك قبل كده و اتصدم فيك ..

صمتي وجع ، بعدد الدقايق و الساعات و الأيام اللي قعدت استناك فيها تراضيني و ما حصلش..

و حتي لو في يوم قررت تراضيني، عشمي فيك بقي زيك زي الغريب،
لاني مش ناوي اتصدم فيك تاني ..

صمتي حب ليك و احترام لكرامتي ، انسحاب مهذب ،
مع خالص دعواتي بكل نجاح و سعادة و انت في حسابات صلاتي و محبتي ، بس بره حسابات عشرتي ..