منتدى الفرح المسيحى - ربنا كان بيقول ( معلش )

https://upload.chjoy.com/uploads/160889272807261.jpg

يارب خلي المعلش بتاعتي زي المعلش الحلوة بتاعتك

عارفين ان ربنا كان بيقول ( معلش ) !!

* لما لعازر مات ربنا جة ولقي مريم ومرثا بيعيطوا
مقلش ( متعيطيش مفيش حاجة تستاهل واية اللي عاملاه في روحك دة)
لكن هو بكي يعني اكنه بيقول ( معلش انا حاسس بيكي )

* مع ارملة نايين لما ابنها مات
مقلش (سيبها لغاية لما تهدي )
لكن تحنن الرب عليها وقال لها : لا تبكي ( معلش انا معاكي وجنبك وطبطب عليها)

* لما قال للسامريه روحي ادعي زوجك وهي قالته ليس لدي زوج
مقلهاش ( احسن مانتي اللي عاملتي في نفسك كدة )
لكن قالها : انتي مكذبتيش وهديكي من ماء ينبوع الحياة الابدية ( معلش انتي حلوة ولسة هتبقي احلي )

* لما شفي مريض بركة بيت حسدا اللي بقالة ٣٨ سنة مستني ينزل المية اول ما الملاك يحركها عشان يخف
مقالوش ( انت مزهقتش من اللي انت فيه دة )
لكن قالة : اتريد ان تبرأ ( معلش انت مدايق من حاجة ؟) و المريض قالة معنديش حد ينزلني المية
كان عارف انه مدايق ومعندوش حد يسمعة ويساعدة اكتر من انه يخف

* لما اصحاب المفلوج نزلوه لربنا وهو بيوعظ
مقالوش ( استني اسمع الوعظة دي عشان انت اللي غلطان )
لكن وقف الوعظ و قالة : مغفورة ليك خطاياك ( معلش انا مش زعلان منك )
ربنا نفسة وقف وعظته ومفضلش يتفلسف علية

* قال : "حولي عني عينيك فانهما قد غلبتاني" (نش 5:6)
(معلش كفاية عشان دموعك بتوجعني )

ربنا عارف ان الآلم النفسي بيوجع اكتر من الآلم الجسدي عشان كدة بيشفيه الاول ..👌