منتدى الفرح المسيحى - لغة القلوب البيضا

https://upload.chjoy.com/uploads/160879493218131.jpg

لغة القلوب البيضا
دي غير لغة اللسان خالص ..

اللسان ممكن يدلس و يزيف و يضحك علي الناس
.. من بره ابيض و من جوه عنف و لوع و نقد و شر و خناق
و نفاق و شقاق و سوء اخلاق ..

لكن القلوب الجميلة ليها لغة تانية سرية توصل لكل قلب من غير ما تستأذن..

القلب الفرحان الجميل الطيب الابيض هو بس اللي "بيسيب علامة"
.. من غير كلام و لا مقدمات كتير بيخش زي "المية" الرايقة
في كل حتة و ما حدش بيوقفه..

لغة القلب الحلو ده تلاقي معاها راحة ما بعدها راحة
و قبول ما بعده قبول .. تصدقها من اول حرف ،
من غير ما يحلف و لا يعيد أو يزيد ..

لغة القلب متشالة علي الصوت و الحروف و الابتسامة .. تلاقي دفا و عفا دخل وجدانك ، و تحس انك مطمن و مرتاح و انت بتسمعها،
و تحس ان حبة ورد اترشوا حواليك جايبين معاهم كوكتيل امل علي سعادة علي سلام علي موسيقي جميلة علي حتتين سكر حلوين..

لغة القلب النقي صنعة الهية زي الشمس الحلوة و النسمة العليلة، محمول علي اجنحة الملايكة ، جاي من فوق ، من سماء السموات ..