منتدى الفرح المسيحى - الرضي باب الجنة

https://upload.chjoy.com/uploads/160789664895021.jpg

جنة الرضي

لما تبقي شايف البذخ اللي حواليك اوعي تقارن نفسك بيهم و لا تتعب لان اللي عندهم مش عندك..

عربية فخمة معدية من جنبك و انت راكب عربية متواضعة أو حتي تاكسى أو توك توك أو يمكن ماشي علي رجليك..

أو ملايين واحد بيقبضها في مباراة أو فيلم أو مسلسل أو صفقة ، و انت يادوب مكفي مصاريف بيتك ، يمكن بالعافية، و يمكن بتتعذر كل شوية و تحتاج و تقرط علي نفسك ..

منتجعات فاخرة و حدايق غناء و ابراج فارهة و انت في شقة متواضعة لا تقارن بكل هذا العز..

هنا ييجي جمال الرضي ..

اوعي تقول اشمعني او قلبك يقولك مفيش عدل ..

ربنا بيمتحن الغني بالفلوس و يشوف مقدار امانته و عطاؤه ، و بيمتحن الفقير و يشوف مقدار رضاه و شكره و قناعته..

اللي بيخللي اللي عندك حلو انك ترضي و تتراضي و تتهني بيه ..

صدقني نفس السرير اللي عند الاغني منك زي سريرك ، المهم مين اللي ينام متهني و يحط راسه في سلام و ابتسام ..

و نفس الفستان اللي عند الست الاغني منك زي اللي عندك، بس المهم مين اللي متهني بجوازته و فرحان بعياله و عايشين في طاعته و في مخافة ربنا ..

برضه نفس الأكلة اللي عند الاغني منك زي اللي عندك ، بس المهم مين اللي عنده الصحة و العافية و سلامة جسمه و نفسه ..

و نفس العربية هي هي ، كله بيوصل ، بس المهم الصحبة الحلوة و القعدة الممتعة مع الحبايب ، و ستر ربنا طول الرحلة..

و الشقة الكبيرة زي الصغيرة بس الجمال في اللي جواها بيحبوا بعض و محوطاهم الملايكة و طالع منهم ضحكة حميلة و ترنيمة مبهجة ..

و الفسحة الغالية زي الرخيصة ، المهم اللقمة الحلوة و الضحكة الصافية و التسابق علي راحة الكل ، و الاستمتاع بالوقت الطيب ..

الرضي باب الجنة..