منتدى الفرح المسيحى - مش عارف تنام زيي

https://upload.chjoy.com/uploads/160576840794381.jpg

اكتشفت ان من كتر ما اتربينا ما بقيناش عارفين ننام
و احنا مزعلين حد حتي و هو اللي غلطان و الغلط راكبه !!

و اكتشفت برضه أن الأخلاق وصلت بينا لمرحلة الخطر (!!)
أن احنا لما بناخد حقنا من حد ظالمنا بقينا بنخاف لنكون عملنا حاجة غلط ، و أن التنازل عن حقنا رغم قهرتنا ارحم من انك تبات و انت حاسس انك سايب وراك حد احتمال ١ % انه يكون مظلوم !!!

ايه كمية الحساسية دي ؟؟ جت لنا منين ؟؟

من كتر الحب يا خال بقينا مش عارفين و لا قادرين لا نزعل حد و لا ندوس علي طرف حد !!

و الغريبة أن فيه ناس بتظلم و تشتم و تهين زي ما بتاكل و تشرب !!
ناس بتنام كل ليلة مرتاحة قوي و يمكن بتغط في النوم
و تشخر كمان، و هي دايسة علي ناس و مبهدلة ناس
وواكلة حق ناس و مشهرة بسمعة ناس و محطمة حياة ناس و ظالمة ناس..

جبنا منين القلب الحساس ده اللي يخلينا ندور علي اللي غلطانين
في حقنا و نراضيهم ، و نرجع اقل حق لاصحابه حتي و هم مش عارفينه، و حوالينا ناس تاكل مال الظلم و حق المظلوم و ضميرها مرتاح قوي..

ايوه قلبنا حساس قوي، ايوه تاعبنا ، بس مش عارفين نعمل غير كده ..
و ايوه طلب الحق حق ، بس مش قادرين و لا عارفين نتخانق عليه أو حتي نطلبه ..

ايوه لازم ما نسيبش حقنا، و غلط نسيب الظالم يظلم ، بس مغلوبين من طيبتنا و تربيتنا و أخلاقنا ..

بنعمل زي سيدنا و تاج راسنا اللي لما اتظلم ، قبل الظلم و هو رافع راسه و ساكت و هو رايح للموت ، و هو عارف ان ورا الظلم فيه قيامة ..

بنرتاح قوي و احنا سايبين حقنا لاله الحق هو اللي يجيبه أو ما يجيبوش زي ما يشوف و يحب و يرضي..

و كفاية علينا اللي ربنا يديه لينا ، و احنا يا خال طيبين قوي و راضيين قوي و صدقني غلابة قوي قوي..

و اللي يجي من ايديه راضيين و مرضيين به ..

و حقنا جاي جاي لأننا ولاد إله الحق ..