منتدى الفرح المسيحى - عايز تتعشم اتعشم في ربنا إللي بيسند و يشجع

https://upload.chjoy.com/uploads/160576461294161.jpg

متهيألي مكنش ذنب بطرس إن مافيش سمك في البحر
، بالعكس بُطرس مكنش مهمل، ده تعب و تعب طول الليل كمان،
بس برضو ملقاش سمك!
حاجة غريبة و مستفزة و تجيب إحباط و هو اكيد كان مستغرب،
بحر طويل عريض مفهوش سمكة! طب نرمي الشبكة هنا طب نجرب هنا ، برضو النتيجة واحدة.

اتاري ربنا كان باصص و مقدَّر كل التعب و الاحباطات و المحاولات دي كلها حتى لو من غير نتيجة بس شاف بطرس إللي تعب و حاول و جاب اخره، وكانت النتيجة جاله عشان يملاله شبكته و سفينته كلها سمك.
ممكن تكون مستغرب من فشل واحباطات ومحاولات كتير وتكون عامل اللي عليك وتكون خلاص هتتجنن إزاي مافيش نتيجة! بس هتلاقي ربنا جالك و حَلَّها بطريقة غريبة عجيبة بمنتهى البساطة و يمكن في خمس دقايق كمان، إزاي بقى منعرفش! هو ده السيناريو المعتاد لربنا.

عايز تتعشم، اتعشم في ربنا إللي بيسند و يشجع، اتعشم في فرحة زي فرحة بطرس لما مكنش قادر يشيل الشبكة من كُتر السمك بعد ما اليأس اتملك منه.
"فَأَجَابَ سِمْعَانُ وَقَالَ لَهُ: «يَا مُعَلِّمُ، قَدْ تَعِبْنَا اللَّيْلَ كُلَّهُ وَلَمْ نَأْخُذْ شَيْئًا. وَلكِنْ عَلَى كَلِمَتِكَ أُلْقِي الشَّبَكَةَ»." (لو 5: 5) ♥️