منتدى الفرح المسيحى - مستخبي ورا ستر الله

https://upload.chjoy.com/uploads/160383482191061.jpg

يا حسرة اللي جري ورا منصب و حفي عليه
، من غير ما ربنا ما يكون أنعم به عليه ..

و أقصد اي مناصب ، أرضية كانت أو روحية ..

يديهالك ربنا آه ، تجري وراها لا و ألف لا ..

المناصب من غير انعام الله مصايب !!

اسعد ناس اللي ربنا اداهم المنصب من ايديه، و الأسعد اللي عاشوا في الضل، يحبوا ربنا و يخدموه و يحبوا الكل و يخدموهم من غير أضواء ..

يا بخت اللي استتر ورا عمود التواضع ، اللي الكرامة بتدور عليه و هو بيهرب منها لأنه مش عاوز منها حاجة ..

علشان كده قال الآباء و منهم "ذهبي الفم" ، عجبي لرئيس يخلص !!

حروبه كتير ، و سقطاته - لو حصلت لا قدر الله - تبقي كبيرة قوي ، و مسؤلياته بتحرمه من راحته و سلامه و عيلته و راحته و نومه ؛ و حرب الكبرياء عليه مرار المرار ، و الحفر اللي بيقع فيها ما أكثرها، و الشباك اللي فاتلها له الشرير ياما جابت عظماء أكبر منه للارض ..

احسن حاجة تهرب من المناصب ، إلا لو ربنا أخبرك و اجبرك و حذرك و كلفك..

يديك معاها المعونة اللازمة و الحماية الكافية ..

و يا بخت اللي هرب من النور و استخبي ورا جمال و ستر الإتضاع ، و يا سعد اللي هرب بحكمة من المناصب ، و اتهني ورا ستر الله ، و طلب مراكز السما قبل مراكز الارض ..

و يا بخت اللي ربنا اختاره ، ( و المُلك كله لله يمنحه لمن يشاء ) ، و ما زال قلبه زي الطفل، و روحه زي الملايكة ، و نفسه متواضعة ، و خصاله جميلة و مشرقة ، و امله اسعاد الناس ، و سعيه لخدمة الله و نيل رضاه ..