منتدى الفرح المسيحى

محتاج حب؟

محتاج حب ومش لاقيه بشكل نضيف

فبتقبل تاخده متعاص بتراب

وبدل ما يرويك بتعطش أكتر

وكإنك بتجري ورا سراب؟

محتاج حنية وحضن يحسسك بالأمان

فبترمي نفسك في حضن مليان بالأشواك

بدل ما يضمك بينتهكك وبيستغل الإحتياج؟

محتاج تسمع كلمة حلوة وتشجيع

وبدل ما تاخدهم من حد شايفك مميز

تسمعهم من ناس مش شايفة غير براك؟

محتاج تلاقي حد جنبك وقت الأزمات

وبدل ما تحس إنك معاه مش لوحدك

تلاقيه نكد عليك وقلب عيشتك لمرار؟

محتاج حد يحسسك بالإهتمام

وبدل ما يسأل عليك عشان يطمن

تلاقيه خنقك بالأسئلة والتحكمات؟

محتاج تاخد لأنك مجرب الحرمان وبدل ما تشبع

تلاقي نفسك مع حد بيحسسك بالإستنزاف

لأنه بيستغلك عشان هو كمان زيك محتاج؟

أو حتى تلاقي حد عمال يديك عطاء مزيف

لأن الحقيقة إنه معتمد على إحتياجك لإنسان

يقبلك ويحن عليك ويحسسك إنك متشاف؟

يمكن تحس من كلامي إني بحبكها وبقفلها عليك

بس الحقيقة إني مقدرة قوي جوعك وحاسة بيك

وإحتياجك ده طبيعي وحق من الحقوق اللي ليك

المشكلة مش في الإحتياج لكن في طريقة التسديد

لأنها بدل ما تشبعك بتضرك وبتحولك

لإنسان مريض

طيب وإيه العمل نكمل جعانين لغاية

ما نموت م الجوع؟

ولا ندور على أكل صحي حتى لو كان تمنه

مش رخيص؟

يمكن تتسرع وتقولي الأكل ده مالوش وجود

بس ده مش حقيقي برغم إنه نادر

ومحتاج مجهود

لكنه أكيد أحسن من أكل معفن مرطرط في السوق

مقرف ومش مغذي وكمان مليان ميكروب

ومافيش حل غير في مجتمع صحي

يديلك حب حقيقي مش مشروط

صحيح أنا صبرت كتير لغاية ما لاقيته

بس الحمد لله كان أخرة صبري ده خير

ونفسي إن إنت كمان تقدر تصبر

وتدور على مجتمع حقيقي

يحسسك إنك مقبول

وماتيأسش ده اللي بيصبر

أكيد في الأخر هينول

منقول