منتدى الفرح المسيحى - اعلي ما في خيلك اركبه

https://upload.chjoy.com/uploads/160196046431791.jpg

اعلي ما في خيلك اركبه

هو ده معني الآية الجميلة "هيجوا أيها الشعوب و انكسروا ..احتزموا وانكسروا!. (إشعياء ٨: ٩) ..

تحدي بيوجهه الله لكل شرير يضايق أولاده، و بيقوله "اعمل اللي تقدر عليه ، انت في الاخر مكسور و مغلوب " ..

في وقت هيجان الأشرار احنا بنتعحب و نتألم و نستغرب و نحتار !!

لكن ربنا له ٣ طرق بيهزم بيها الأشرار بعد ما بسيبهم "يهيجوا و يحتزموا" !!

١-يهزمهم فعلا و يكسر فخاخهم و يظهر نصرته الواضحة ، زي ما شق البحر لموسي و شعبه و عبروا بسلام و بعدها غرق فرعون و كل جيوشه (خروج ١٤ و ١٥) .. نصرة علنية واضحة ..

٢-يوقف شرهم ، يجي لغاية رجليك و يقف .. زي لما البحر هاج علي التلاميذ، و مفيش نقطة مية دخلت المركب ، و آخر الليل جالهم و اسكت العاصفة ووصل المركب بسلام للشاطيء(متي ١٤) ..
و برضه زي الثلاث فتية اللي سابهم في النار من غير ما تلمس هدومهم ، و زي الأسود لما جت عند رجلين دانيال و نامت ..

نصرة داخلية أن قلبك مطمن أن الشر اللي حواليك مش ح يهز سلامك و ثقتك في اله الكون و ضابط الكل ..

٣-نوع تالت من النصرة أن الله يسيب مؤامرة الأعداء تكتمل ، و الشر يبان انه غلب، بس ربنا بيخللي نفس الشر يعمل لصاحبه خير مضاعف .. زي يوسف ما اخواته رموه في البير، و بعد سنوات قليلة البير ده هو اللي وصله لعرش مصر ..

نصرة مضاعفة أن الشر يتحول لخير ..

يبقي شر ينكسر ..
و شر يقف ..
و شر يتحول لخير ..

مش ربنا عنده حق و هو بيقول للاشرار "هيجوا و احتزموا و انكسروا " ؟!