منتدى الفرح المسيحى - بعد شوية كله بيبقي "سابقا"

https://upload.chjoy.com/uploads/159951501769541.jpg

اي مكان أو منصب في الدنيا ح يجيله يوم و يبقي "سابقا" ..

كان ياما كان ، أيام زمان ، كان كبير حتته ، و مدير شركته و عظيم مكتبه،
و بعدين خلصت مهمته، و انتهت وظيفته و بقي "سابقا " ..

و اللي فيكم فاكر فيلم "زوجة رجل مهم" للعبقري "أحمد زكي
" لما عاش حياته اسير وظيفته السابقة الهامة
، كان عامل مشهد يستحق عليه " أوسكار " ،
و هو بيجر فكهاني بسيط رفض أن يبيع له بالتخفيض اللي كان متعود عليه و هو في منصبه
؛ و اقتاده لمكتب المأمور و هو يأمره بسجنه ،
و بيعرفه بوظيفته الهامة و بيقوله بعدها بانكسار "سابقا " ..
و اذا بالمأمور ينادي عسكري صغير و يقوله بنظرة مهينة و هو شبه بيطرده من مكتبه
"روح مع حضرته شوفه عاوز ايه" ..

لو كل واحد عرف أن ح يجيله يوم يبقي "سابقا" ما كانش اتغر و كان حسب حساب "لاحقا " !!
و سابقا دي بتيجي بانتهاء الوظيفة أو الإقالة أو العجز او الشيخوخة او المرض ، أو حتي بانتهاء العمر..

و ياما الزمان طوي سيرة ناس و محاها ، أو ساب الناس تذكرهم بأسوأ الذكريات..

لو كل واحد فكر في "لاحقا" ، كان عامل الناس احسن معاملة و راعي ربنا فيهم ..

و كان برضه خاف ربنا و عمل حساب أن "فوق العالي عاليا يلاحظ و الأعلي فوقهما" (جامعة ٥ : ٨) ..

و كان كمان عرف أن لا المناصب ليها امان و لا الفلوس او النفوذ أو الناس أو العزوة أو الممتلكات لان كله بعد شوية بيبقي "سابقا" ..

اللي عمره ما بيقدم و لا بيتنسي و لا بيروح، محبتك و خدمتك و سمعتك
و سيرتك و امانتك و أخلاقك و فضايلك..
ده بس اللي ينفع "حاليا " و "سابقا" و "لاحقا"