منتدى الفرح المسيحى - لما بنكبر في السن

https://upload.chjoy.com/uploads/159885685417411.jpg

لما تكبر فى السن فى ثوابت بتتغير فى حياتك
بعد ما كنت مقتنع بمثل بيقول كل إللى يعجبك والبس اللى يعجب الناس هتلاقى نفسك بتاكل و تلبس اللى يريحك
بدل ما تقول إللى اتلدغ من التعبان يخاف من الحبل هتلاقى نفسك مبتقربش من تعابين ولا بتاخد بالك اصلا ان فيه حبل
بعد ما كنت بتشيل محفظة و تليفون و مفاتيح بيزيد عليهم نضارة قراءة
الصوت العالى حتى لو مزيكا بيضايقك بعد ما كنت زمان بتحب المزيكا تهز كيانك
بتحب تروح البحر بس مش علشان تنزل لكن علشان تقعد تفضى ضغوط الدنيا بانك تعد الموج و يمكن كمان تكسل تعده فتسرح بنظرك فى الفراغ
مش بيهمك اوى موتور العربية كام حصان لكن بيهمك اوى التكييف ميعطلش
الزمن بتعتبره خصم و بعد شوية بتعمل معاه صلح و تسيبه ينحت وشك بخطوطه
كلامك مع نفسك بيزيد و مع الناس بيقل
بتحن لايام طفولتك و تزور اماكن عشت فيها زمان لكن مش بتسعدك زى ما كنت متخيل يدوب بتبتسم لما تشوفها
بتحن اكتر للبيت و العيلة بعد ما كنت شوارعجى بتموت فى الخروج و السهر
بتحاسب نفسك اكتر كتير
بتشتاق للسكينة
للصحبة الهادية
خوفك من الدنيا بيقل و خوفك من ربنا بيزيد