منتدى الفرح المسيحى

https://upload.chjoy.com/uploads/159704521368971.jpg

في ضغوطات بتكون لأسباب عارضة وبتعدي،
لكن كمان في نوع من الضغوط ناتج عن طبيعة شخصيتي،
وده بيكون أصعب لأنه عميق ومتكرر.
فلو في شخص مثلاً كمالي - مهووس بالكمال..
بيكون معرض للضغط المستمر
لأنه حاسس طول الوقت إن لسه في أفضل،
ولما بيوصل للأفضل مش بيقتنع بيه، وبيحس إن لسة في كمان.
الشخص ده طول الوقت مضغوط
إنه عايز يوصل لحاجة مش هيوصل لها أبدًا.
ولو شخص عنده حساسية زيادة..
بيكون عنده ضغط مستمر في موضوع العلاقات،
لأنه بيحس بحاجات محدش بيحسها غيره،
نتيجة لأنه بيطلب محبة ورضى وقبول من الناس زيادة،
وده مش هيحصل عليه طول الوقت.
وأحيانًا يتحول الموضوع للعكس، فيبقى الشخص ده قاسي
وفظ مع الناس علشان يحمي نفسه من فكرة عدم قبولهم ليه.
كمان الأشخاص اللي بتخاف من الفشل،
الخوف ده بيكون سبب ضغط زيادة عليهم في رحلة كفاحهم،
فيتحول لأزمة قوية تخليهم أحيانًا
مش بيجربوا حاجة جديدة خوفًأ من الفشل،
والوقت اللي مفروض فيه بياخدوا قرار معين،
بيكون أكتر وقت ضغط في حياتهم.
كلنا عندنا مشاكل في شخصياتنا بطرق ونسب مختلفة،
محتاجين في "وقت البراح" نشتغل على فهمها وعلاجها ونموها،
وبالتالي بدل ما تكون سبب للضغط تكون سبب للراحة والعلاج 😍