زوّادة اليوم: أستطيع كل شيء في المسيح الذي يقويني

بيخبرو عن رجّال ختيار من الحرفيّين اللي بيشتغلو بإيدن بس شغلتو مش عاديّة. هوّي بيجمع القزاز المكسور و بيعمل منّو لوحات و تحف. اجمالا نحنا بالبيت اذا انكسر صحن، كبّاية او اي شي منكبّو. بس الإشيا اللي بتنكسر اذا وقعت بإيد بتشوفها بغير طريقة بترجعها احلى من ما كانت!
نحنا هيك كتير صعوبات و مشاكل منواجهها بالحياة بتكسرنا. يمكن الناس يكبّونا متل اي شي مكسور و مش اكيد رح نلاقي بيناتن حدا يعذّب حالو و يشوف هالقطع الزغيرة، منّن رح يقولو مش حرزانة و منّن رح يخافو يجرحو حالن بشي قطعة و منّن بيفَضلُو يفَتشو عا حدا كامل مش مكسور.
ما في إلّا ربنا قادر يرجع يجمع هالشقف المفرفطة و يطلع منها انسان جديد احلى و اقوى...أنت أيها الرب القوي إله الصباؤوت، أستطيع كل شيء في المسيح الذي يقوّيني...الله معكن