منتدى الفرح المسيحى - الاحتمال درجات

https://upload.chjoy.com/uploads/159390452838951.jpg

مش كل الناس بتستحمل ..

الجوع مثلا فيه ناس بتستحمله ساعات طويلة ، و فيه ناس معدتها "حامية" ، احتمالها اقل بكتير من غيرها .. الناس دي ما نلومهاش ، لكن نفهمها و نقبلها و نساعدها تعمل ايه علشان تتدرب علي ترويض اكلها ..

كمان في الغضب ، فيه ناس سريعة الغضب بطبعها، انفجارية، ما يستحملوش اقل توجيه .. غير ناس تانية بالها طويل بتشوف الجانب الايجابي و تحسن الرد علي المختلفين معاها ..

برضه الناس دي عاوزة اللي يفهمها و يساعدها تشوف انها بتفقد مواقف و أشخاص بسبب اندفاعها اللي بيخسرها كتير قوي..

ايضا في الألم الناس درجات ، واحد ملول شكاي، اقل وجع يكدر يومه.. وواحد تاني صبور حمول راضي يقدر يعيش تحت الوجع من غير ما يتذمر..

الدروس ..

١-الناس مش زي بعضها ، و الناس برضه مش زيك..
فهم الناس و طبايعهم يساعدك تبقي فنان في العلاقات الإنسانية..

٢-سبب الاختلاف أسلوب التربية و النشأة و الضغوط و الاحباطات اللي بنتعرض ليها ..يبقي تقبل غيرك لأنك لو كنت مكانه و في نفس ظروفه كنت ح تبقي زيه..

٣-الطباع بتتغير بصعوبة و مجهود .. عاوزة نعمة الهية
و صبر و متابعة .. و اكتر حاجة لتساعد الناس تتغير
لو لقيت حد يحبها و يقبلها زي ما هي و يطول باله عليها..

و يا ريت تكون واحد من أصحاب البال الطويل
و الروح الرحبة و الأخلاق السمحة اللي بتخللي الدنيا حلوة
و تساعد الناس تبقي أحلي ..