منتدى الفرح المسيحى - *شهوة التعب* 😍

*شهوة التعب* 😍

https://upload.chjoy.com/uploads/159179198228241.jpg

الواحد ممكن يكون عندة شهوة الراحة
(يعني تبقي متضايق او تعبان و نفسك تترمي علي السرير )
لكن ايه شهوة التعب دي ؟؟!
يلا تعالوا نشوف
ساعات تلاقي حد واقف طول القداس و رجله وجعاه بس هو مبسوط وحاسس انه بيقدم جسده ذبيحة للمسيح
و الموضوع دة يفكرنا بالآية اللي بتقول
*"كل واحد سيأخذ أجرته بحسب تعبه "*
مش مهم نوع خدمتك ولا انت معروف قد ايه و كنت خادم ولا امين خدمة ولا كاهن
لكن اللي هيفرق فعلا في السماانت قد ايه تعبت من أجل المسيح
يبقي اللي فاهم ربنا و فاهم طريقته بيشتهي التعب مش عايز راحة..ميحبش يقعد و الناس تخدمه، يحب هو اللي يخدم الناس
زي ما اتقال عن المسيح *« ابْنَ الإِنْسَانِ لَمْ يَأْتِ لِيُخْدَمَ بَلْ لِيَخْدِمَ، وَلِيَبْذِلَ نَفْسَهُ فِدْيَةً عَنْ كَثِيرِينَ».*
هنتكلم عن سبع أشكال للتعب اللي بيحركهم الحب ...و كل واحد يقيس و يشوف نفسه بيتعب قد أيه من أجل المسيح
1⃣ *المبادرة:-* يعني تساعد الناس دون طلبا منهم
كل يوم انت بتشوف حد تعبان و اكتر من %90 من التعبانين مش هيجوا يقولوا احنا تعبانين
فكده هتكون خسرت %90 من الفرص لأنك مستني حد يقولك ساعدني
اللي عمل دة بكفاءة كان *السامري الصالح* محدش طلب منه لكن هو بادر و اخد من وقته عشان يخدم واحد بيموت او تعبان.
لو اكتسبنا الفكرة دي هنتعب شوية بس رصيدنا في السما هيزيد اضعاف
2⃣ *الاستماع الجيد:-* يعني اسمع لحد تعبان.
و الاستماع ده بعقلي و بقلبي يعني ابقي حاسس و متفاعل مع الشخص ده ..و يكون كمان الاستماع بوجه بشوش متفهم، واخلي بالي وانا بسمع حد تعبان ان تعبيرات وشي متتعبش اللي قصادي
3⃣ *العطاء وبسخاء:-*
عطاء "مادي"... وعطاء "عيني" يعني عندك حاجة وغيرك محتاجها دلوقتي لية متدهالوش هتقولي اصلي احتمال احتاجها طب ما هو محتاجها دلوقتي
و انت بتدي ادي بفرح و يكون عندك إيمان و ثقة ان اللي انت اديته دة متخزن ليك في السما
*”و المعطي فبسرور مش بس بسخاء “*
4⃣ *الاحتمال:-* الناس تقول انا مش بستحمل اللي مش منظم، الكبار في السن، العصبي، اللي طلباتهم كتيرة وغيرهم... لكن المحبة تحتمل كل شئ... استحمل الخدام زمايلك و استحمل المخدومين بلا تزمر بلا اعتراض وبلا تأفقف
5⃣ *التعب في التشجيع
و ده مش متعب اوي بس تأثيره كبير جدا ..و التقدير كمان دة شئ حلو
احنا متعودين ننقد و نشوف عيوب لكن متعودناش نشجع و نشوف المزايا
6⃣ *الاعتزار و التسامح و العتاب
*الاعتزار* ده حب بس حب متعب شوية لانه بيجي علي الكرامه... في ناس تعرف تخدم لكن متعرفش تقول *sorry*
أما اغلط وأقول أسف ده مش بيقلل مني بالعكس دي بيكبرني في نظري ونظر اللي حوالي، قول أسف اني استعجلت و حكمت عليك من غير ما اعرفك كويس، اسف لو الكلمة اللي قولتها ضايقتك.
*التسامح* دة كمان شئ متعب، لما حد يغلط فيك بتبذل مجهود عشان تسامحه.
*العتاب*
*كمان مش سهل ،بس دي وصية "إن اخطأ إليك اخوك اذهب وعاتبه"* عشان تربحه أعمل مجهود أنك تتصالح مع الناس و أعمل مجهود أنك تصالح الناس على بعض مهما كانت الظروف *" طوبي لصانعي السلام لانهم ابناء الله يدعون "*
و العتاب بيبدأ بكلمة، انا اتضايقت، انا حسيت، مش انت عملت
7⃣ *الصلاة من أجل الاخرين ده تعب مقدس، لو عندك شهوة التعب مش هتبطل صلاة من أجل الناس .
وانت بتصلي عشان حد تخيل نفسك مكانه
"اذكروا المقيدين كأنكم مقيدين"
*"يَا أَوْلاَدِي، لاَ نُحِبَّ بِالْكَلاَمِ وَلاَ بِاللِّسَانِ، بَلْ بِالْعَمَلِ وَالْحَقِّ"
*(رسالة يوحنا الرسول الأولى 3: 18)