زوّادة اليوم: قدروا قيمة النعمة

بيخبرو عن زلمي و مرتو كبار بالعمر. سألها الرجّال: دخلك مرق عيدك السنة و انا ما تذكّرت؟! قالتلو لأ! قلها: كيف؟ انتِ عيدك بشباط و صرنا بنيسان، صايرة عم تنسي يا مرا. قالتلو لأ! استغرب هالزلمي لدرجة اقتنع انّو مغلّط! قامت قالتلو: تاريخ حبّك الي هوّي تاريخ ميلادي، يعني كل يوم!
عم نسمع كتير انّو العنف الأسري عم يزيد مع الحجر المنزلي و انّو نسبة النساء المعنّفات صارت عالية كتير. كيف هيك؟! معقول ما عم تشوفو بغير بلاد كيف ناس عم تموت وحدها بالمستشفيات عم تتمنّى حدا من عيلتها يشدّلها عا ايدها؟ ما عرفتو قيمة انّو عيلكن معكن و الحمدالله الكل صحتو منيحة؟ يا رب فتّح عيون و قلوب هالناس حتّى يقَدرو قيمة النعمة اللي هنّي فيها و خود حق كل مظلوم و رافقن و احميهن... حبّو بعضكن اليوم لأنّو ما حدا ضامن بكرا...الله معكن