منتدى الفرح المسيحى - جه اللي يربينا

https://upload.chjoy.com/uploads/158608457859091.jpg

كنا مش بنسلم و لا بنحضن بعض ، أو بنسلم في العلن و نكره بعض في الدرا ..
ادي اللي في نفسنا الوحشة تحقق ،
و ما بقيناش حتي قادرين نسلم علي اللي بيحبونا ،
و كأن الوبأ بيقولنا اشربوا من كأس الجفا اللي كنتم عاوزينه ،
و ابعدوا عن بعض ، و اتمنوا حتي ضل بني ادم مش ح تلاقوا ..

مش كنا بنضحك علي بعض في تقوي مظهرية
، و كان كل غرضنا من العبادة مين اللي يبان اكتر ..
اهو جه كورونا يربي الكل ، و يقولك كنت بتجري علي العبادة اللي في العلن
، و ما انتاش طايق تصلي لربنا في الخفا لان ما حدش لا شايفك
و لا بيمدحك و لا بيسمعك ، اقعد في بيتك زي الألف
و ح تخش مخدعك في الخفاء لان ما بقلكش غيره ..

مش كانت الكنيسة مش عاجبانا ؟ القداس طويل و الخدام معثرين ،
و الآباء مش مريحنا ، و العظات مش علي مزاجنا؟
ادينا واقفين علي بابها مستنين بابها يتفتح و نجري علي عواميدها نقبلها
و نتمني بس رجلينا تلمس ترابها ..

كنا بنجري ورا الشغل و الفلوس في سبق محموم ،
و نسينا نهدي و نراجع ضمايرنا و نهتم بالسما اللي رايحينها بعض فترة طالت أو قصرت ..
جه اللي يربينا و يحطنا قدام الحقيقة الاي هربنا منها العمر كله
، و اللي ما نفعتش فيها اي وعظة : ح نعمل ايه لو ربنا طلب منا حساب الوكالة دلوقتي ؟؟

كنا مش طايقين بعض ، و الجواز و رباية العيال كانت آخر حاجة نفكر فيها ؟؟
ادينا بالعافية اتحبسنا في البيت و بقي وشنا في وش بعض،
و بحكم الحبسة اتادبنا و بقينا نعامل بعض احسن معاملة ؛
ح نهرب من بعض فين ؟؟
و لو اتخانقنا ح نتصرف ازاي في وضع زي كده ؟؟ الطيب احسن !!

بجد : رباية ما بعدها رباية ...