زوّادة اليوم: أحترم إختلاف الآخر

بيخبرو عن نملة زغيرة جايي جديد على ضيعة الحيوانات ، عزمها الثعلب مختار الضيعة عا حفلة حتّى تتعرّف عالكل. هيّي و رايحة بتطلَع قدّامها بزّاقة، بتقلّها: فيكي تمشي اسرع، اذا بقيتي هيك منوصل بكرا. بيجاوبها الثعلب: البزّاقة هيك ربنا خلقها ما بتقدر تعمل أكتر، اذا بدّك قَطعي عنها. شوي شافت الفيل و قالت: ليش ناصح هلقد؟ بدّو ريجيم، هلّق بيهربو الحيوانات بيفكرو جايي ياكلن!
جاوب الثعلب بكل صبر : اذا بتشوفي فيل ضعيف بيكون مريض! ربنا خلقو حجمو كبير! انتِ بتقبلي حدا يقول ليك النملة مش مبينة قد ما زغيرة؟و انت عارفة كتير منيح انّو شو ما عملتي ما رح تصيري أكبر من هيك! هالخبريّة رمزيّة بتضوّي عا اشيا بتصير كل يوم معنا،مع ولادنا، او مع ناس غير. لازم نحترم اختلاف الآخر و ما نجرح مشاعر حدا بتعليقات مش بمحلها! ما تكونو متنَمرين و لا توقفو ساكتين قدّام هيك موقف...تذكّرو انّو يسوع قال: من قال لأخيه يا أحمق يستوجب نار جهنّم. والله معكن.