منتدى الفرح المسيحى - حاول تتمتع بالقداس انت جاي تصلي

https://upload.chjoy.com/uploads/158188205434291.jpg

ناس كتير في القُداس
بتبقى مش حافظة المردات ،
طبعًا بتبقى مكسوف، وبتضطر تحرك شفايفك حفظًا لماء الوجه
وتفرح أوي لما يبدأو يقولوا كيرياليسون ،
تلاقي صوتك علي والنغمة مظبوطة ،
لكنك سُرعان ما تبُص في الأرض لما المرد يطول شوية ،
بعد شوية تبدأ تحس بالملل ، وتبُص في الساعة !!

لو كان بيحصلك كده ،
يبقى ركز معايا ..

أولاً : حضورك القداس بركة عظيمة لأن الرب نفسه حاضر.
ثانيًا : ماتركزش مع الناس ،
وملكش دعوة ومتقلقش ناس كتير زيك كده.
ثالثًا : في موضوع إنك مش حافظ ،
مش هقولك احفظ ألحان
، دي حاجة لازم من جواك تتحرك نحوها
، العيب مش ع الكنيسة ،
فسيبك من شماعة إبليس بتاعة ليه ميخلوش الصلوات كلها بالعربي ، وتعمل زي تلميذ خيبان نفسه يصحى الصُبح يلاقيهم شالوا الإنجليزي
من المُقرر عشان هو مش بيعرف إنجليزي !!
وعشان متزعلش مني :
أكتر من نص القداس بيتقال بالعربي
، هل انت بتركز وبتتأمل فيه ؟ كفاياك بس تتأمل في الصلوات بالعربي ..

هتقولي : وأعمل إيه لما يكون اللحن مش عارفه ؟
ارفع قلبك لربنا وصلي من قلبك صلاة ارتجالية ،
وخلي عينك على المذبح ، اطلب من روح الله يفتح عنين قلبك وتتمتع بالمسيح ،
الكاهن والذبيح ..

حاول تتمتع بالقداس ، انت جاي تصلي ، صلي وارفع قلبك ليسوع ..
دي أهم حاجة.