منتدى الفرح المسيحى - ربنا له رأي تاني

https://upload.chjoy.com/uploads/158120229461321.jpg

إبراهيم ينزل مصر بسبب الجوع، و يقول عن سارة انها أخته ، و فرعون ياخدها لبيته ..
يا كان يرجع كنعان من غيرها ، يا يروح لفرعون و يعترف انها مراته و يعرض نفسه للموت ..
ربنا كان له رأي تاني : يضرب فرعون بضربات عظيمة ،
فيعرف أنها زوجته و يرجعها لإبراهيم و معاها هدايا و عطايا كتير .. (تكوين ١٢) ..

يحصل جوع في أيام إسحق، يا ينزل مصر زي إبراهيم يدور علي الاكل
، يا يقعد و يدوق مرار الجوع و العطش ..
برضه ربنا له رأي تاني ..
يبارك له في الزرع ، منين ما يحفر الارض تفيض ميه و خير ،
فيزرع في سنة الجوع دي ١٠٠ ضعف ( تكوين ٢٦) ..

موسي بعد ما قتل المصري و هرب ، يا كان فرعون ح يقبض عليه ،
يا كان ح يموت من العطش و الجوع في الصحراء..
لكن ربنا كان له رأي تاني ..
يلاقي رعاة بيضايقوا صفورة ، فينقذها، و بعدين ابوها يحتضنه في بيته و يجوزها له ،
و يستخبي عنده ٤٠ سنة لغاية ما ربنا يرسله تاني لمصر (خروج ٢ و ٣) ..

موسي قدام البحر بيصرخ (خروج ١٤) .. فرعون و جنوده يا ح يقتلوه مع كل الشعب ،
يا ح يرجعوهم مصر للعبودية من تاني ..
برضه ربنا كان له رأي تاني ما خطرش علي بال حد..
البحر ينشق ، يعبروا منه ، و فرعون و جنوده يغرقوا بالكامل فيه ..

اطمن يا صديقي ..
ربنا علشانك يقلب الموازين و يغير التواريخ و المواقيت ..

ربنا دايما عنده حل تاني و تالت و رابع يريحك و يفرحك
، لا عمرك فكرت و لا حتي حلمت بيه ..