منتدى الفرح المسيحى - ألف سلام لبابا

https://upload.chjoy.com/uploads/158111509259591.jpg

اكتب عن بابا المرة دي ..

بابا المطحون زي ماما، بس كمان ما ينفعش يشتكي ابدا لأنه "راجل" ،
و الراجل مطلوب منه انه يبقي البطل ، اللي يعمل اي حاجة و كل حاجة علشان بيته ما ينقصش اي حاجة ..

بابا اللي مخبي عواطفه جواه، و بيموت حرفيا كل يوم علشان يكفي بيته .
. شقيان و متمرمط في الشغل .. عامل نفسه ما بيتوجعش و هو بيبكي لجوه .
. حابس دموعه و حاضن همه و هم بيته ، و بيلف في طاحونة اليوم يعمل المستحيل
علشان يأمن مستقبل مراته و عياله ..

بابا اللي ضحكته منورة البيت مش عارف يضحك من قلبه ، عامل نفسه مبسوط
و هو بيتسحل حرفيا قدام طلبات الدنيا اللي ما بترحمش و إحتياجات ما بتخلصش ،
و مش عاوز يحسس حد بعجزه أو حيرته ..

بابا الكلمة اللي تطمن ، الضهر اللي بيسند ..

أسد من بره و طفل من جوه ، مخبي عواطفه اللي لو سابها تبينه ضعيف و مقهور
اللي بييجي علي نفسه علشان يشوف بس ضحكة جميلة في عيون ماما و الاولاد ..

ألف سلام لبابا ، لاحلي كلمة قلناها لربنا اللي في السما، و بعدين قلناها لبابا اللي علي الارض