|
الكلمة اللى بتطمنى ع اللى جى كلمة لتكن مشيئتك
https://upload.chjoy.com/uploads/158094933172741.jpg عزيزى الله يا من تسجد لك كل ركبة وتسبحك كل خليقتك ما فى السماء وما على الارض اسمح لواحد غير مستحق انه يطلب منك وانا عارف وواثق انك بتنظر بعين رحمتك لكل طلب بيترفع لك انا جاى احط بين ايديك كل اللى جواهم شئ مش متشاف اللى جواه ضعف وعجز اللى مش قادر يحكى واللى بيخاف فيه كتير جواهم كلام كلام عن وجع من اقرب الناس لو حكوه مش هيخلصوا من الملام ولو سكتوا هيتخنق جواهم الاحساس حنن قلوب اللى واجعينهم وابعت للموجوعين سندة فى قلوبهم الابن اللى امه بخلت بمشاعرها عليه شايفها قدامه ولا حاسس بحنيتها ولا قادر يبص لها بعينيه دوب الحجر اللى فى قلوب امهات كتير يضموا ولادهم اللى اتصابوا من قسوتهم صحى فيهم الضمير والبنت اللى اتحرمت من حضن اهلها وغصب عنها رمت للغريب نفسها استر عليها ورجعها ولو اللى ليها رموها انت ابو اليتيم .. اسندها وشجعها الزوجة اللى عايشة فى بيت ومقهورة من زوج .. القسوة عامية عينيه ووسط كل اللى عايشاه بتحابى على بيتها اللى كل مايقع تقوّم فيه والزوج اللى اتصدم من قسوة مراته والسنين بتجرى بيه فاقد احترامه حتى لذاته خايف ينطق يقولوا ضعيف وقلبه كل يوم يتحسر على سنينه اللى فاتوا الخجول اللى بيخاف يتكلم والمنطوى اللى مابعرفش يسلم اللى شايل جواه خطية ومش عارف يتوب عنها وحاسس انك بتجازيه بسببها وبيقول ان كل ضرر فى حياته .. منها اللى الادمان اتملك منه ومش قادر يحكى واللى فلوسه خلصت ومش قادر يطلب وبسبب عجزه بيبات ليالى يبكى اللى مربوط بفعل الرذيلة وخايف يتكشف واللى غلطت فى حق نفسها ومرعوبة غلطها يتعرف اللى بيتهته فى الكلام واللى ضايع من نطقه كتير حروف اللى مكسوف من عيب فى شكله واللى كبر والضلمة لسة بالنسبة له مصدر خوف اللى حكى على وجعه كتير ومالقاش اللى يحس بيه واللى المشاكل قطمت ضهره ومابقاش فيه كلام يشفيه اللى الحياة من زمان معانداه واللى بيقول ان قطر الفرح ماوقفلوش وعداه اللى بيعرج ومافيش ولا ايد سنداه واللى ايامه ملاها الحزن يا ولداه كل دول وفيه كتير غيرهم كمان جواهم وجع مش متشاف لكن انت كاشف الخفايا وعارف اللى شايلاه القلوب انت اللى فى ايدك تمنع البلايا واللى برحمتك بتغفر الذنوب طبطب يا رب على كل محتاج انت ما بتردش اى حد جالك واللى عاش طول سنينه منسى ابعت له سندة تطمنه انه علطول فى بالك اللى الخطية مسلسلاه ومش عارف يتوب حرك قلبه ناحيتك دانت رب القلوب اللى التجارب تقلت عليهم ابعت اللى يقويهم واللى الحزن هرى قلوبهم ضمد واشفى حن عليهم انا عارف انك مش مستنى اللى يقولك دى فى الاول والاخر خليقتك بس انا باكلمك بحسب رحمتك اللى كفلتها لنا اجمعين باكلمك بحسب احساناتك ومين غيرك معين واخيرا باكلمك عشان انا نفسى واحد من كتير موجوعين وايا كان الخير اللى هييجى بطريقتك الكلمة اللى بتطمنى ع اللى جى كلمة "لتكن مشيئتك" آمين |
| الساعة الآن 01:09 AM |
Powered by vBulletin® Copyright ©2000 - 2025