منتدى الفرح المسيحى - لو كان وحشا لقاتلته و قتلته

https://upload.chjoy.com/uploads/158040508664341.jpg

لو كان وحشا لقاتلته و قتلته..

عن الاكتئاب أتحدث ..

عن الوحش اللي بينهش القلوب و العقول و الأجساد..
عن الظلام اللي بيطارد النفوس الجميلة ..

عن السفاح اللي بيهجم علي النفوس البيضا و القلوب المعطرة
بالنقاء و الصفاء ، و الطفل اللي بيمرح في ضلوع الحزاني
و الموجوعين ..

المجرم ده له نهاية ، و ح نحاربه سوا..
ح احاربه معاك و بيك و علشانك..

و ح نخللي الدوا الطبي في الاخر ، لو سمحتلي
، و الدوا ح يبقي مرحلة و ح ينتهي ، ما تخافش ..

الدوا الأول فيك و بين ايديك ..

الدوا في عقلك لما يرفض افكاره المُرة و ذكرياته البطالة
و حواراته الفارغة ..

الدوا لما ترفض خدعته الشهيرة أن "ما لكش علاج "
، و تعيش في الكذبة دي ..

لما تصدق انك أقوي منه ، حتي و هو موجود حواليك بيحاربك
و يخنق مشاعرك ، لما تبطل تديله عقلك وودنك..

لما يعدي ضله جنبك فما تسمحش له أنه يخوفك..

ح تهزمه لو قدرت تملا وقتك بحب الناس بالذات الموجوعين اللي زيك..

ح تهزمه لما تصدق ان حد بيحبك زي ما انت ، حتي و انت حزين ..
لما تطمن أن قديسين و عظماء اتوحعوا زيك
و اترموا في حضن الصلاة و عرفوا أن الله شاريهم و حاببهم
و مسامحهم و حاسس بيهم ، زي ايليا و داود و موسي و يونان ..

ح تغلبه يعني ح تغلبه ..

حط وجعك تحت رجليك ، و سيبه هناك ، ده مكانه الحقيقي ..