منتدى الفرح المسيحى

https://upload.chjoy.com/uploads/157990465730781.jpg

فيه ناس طبعها تنشف الريق : رد جاف، لف و دوران ، ملاوعة،
وعود كدابة، تقول و ما تعملش، طلبات و أوامر..

ناس ما تعرفش تحترم كلمتها ، غاوية تتعب اللي حواليها، شكاكة
، شكاية بكاية ، غاوية أذية ..

و ناس كلها نور و سلام متصالحة مع نفسها، غاوية تبل ريق الناس بكلام الذوق و الحب
.. ناس بتعرف تشوف المناطق التعبانة و العيانة في الناس و تحس بيها و تتحنن عليهم .
ناس بيضا قوي من جوه ، تحب تريح الكل حتي علي حساب راحتها ،
تعرف تخش جوه كل واحد لغاية ما تريحه، و ما تسيبش حد إلا لما تفرحه ..

فاكرين الغني لما طلب أن لعازر يبل له طرف لسانه و هو في الجحيم ؟؟ (راجع لوقا ١٦ : ٢٤)
.. يظهر أن لعازر قبل ما يموت كان متعود يعمل له كده ؛
كان كل ما يشوفه يدعيله حتي و هو قاسي عليه بكلمتين حلوين زي "ربنا يسعدك و يريح قلبك
، ربنا يوسع رزقك " ..

و يظهر برضه أن الغني كان منشف ريقه ، بقسوته و أعماله و اهماله
.. و ما كانش حد بيحن علي لعازر إلا الكلاب اللي كانت بتلحس قروحه (راجع لوقا ١٦ : ٢٤)
؛ كانت احن من الغني عليه ..

و لفت الايام و أشتهي الغني أن لعازر يبلله لسانه في نار العذاب و طبعا ما نفعش !!

الف سلام للناس اللي ربنا باركها و علمها تبرد قلوب غيرها بالحب و الاحترام
، و اللي بتبل ريق الناس ، بالكلمة الطيبة و الدعاء لهم بالبركة .
الناس اللي بتدي من غير ما تاخد ، الناس اللي بتخدم من غير مقابل
، الناس اللي بتوزع حب و مش مستنية من اي حد اي حاجة..

الف سلام للناس اللي فاكرينهم و ح نفتكرهم بكل الحب، اللي رووا عطشنا برقتهم،
و بسببهم حبينا الدنيا من خلالهم .