منتدى الفرح المسيحى - متلازمة الإسعاف

https://upload.chjoy.com/uploads/157407065233711.jpg

عربية الإسعاف عندها ألف حق و حق
لان حياة مريض في خطر :
سواق مستعجل و علي آخر درجة قلق، سارينة متواصلة
، سرعة رهيبة ، لو عربية ما وسعتش يزمر لها تاني
و تالت و عاشر ، و ما يهداش إلا لما يسبق الريح لان الثانية بتفرق..

لكن فيه ناس عايشة حالة "الاسعاف " في السواقة
و من غير اي سبب .. جري و عصبية
و كلاكسات و نرفزة و غرز ؛ يا تري ليه و مستعجل علي ايه؟؟
هل بيحاول يطلع طاقة غضبه علي الناس ، جايز
.. هل السواقة دي هي المجال الوحيد اللي بيحس فيه
بقوته و تفوقه بعد يوم مليء بالإحباطات
، برضه جايز .. هل عاوز يثبت للي راكب (او راكبة معاه )
انه بطل خارق و عنتر زمانه، جايز جدا
.. المهم هو بيعرض حياته و حياة اللي معاه و اللي سايق جنبه للخطر علسان يوفر له كام دقيقة ما لهمش اي لازمة و لا معني ..

لكن كمان "متلازمة الاسعاف" دي فيه ناس عايشاها جوه يومها،
من غير ما تسوق عربيات ..

زعيق و صويت، عصبية و عنف، تسارع و تسرع
و جري من غير هدف، خناق مع الكل ،
هو متوتر و موتر الكل حواليه..

صاحبنا ده اللي مشغل سارينة القلق عيان ، قلقان ..
و كل اللي بيجري عليه ووراه تعبان منه و تعبان عليه ..

يا صديقي ، كله ح يخلص احسن بروقان البال ،
من غير وجع القلب اللي انت فيه ..

خد الدنيا علي مهلك من غير رمح و هري،
اعمل اللي تقدر عليه و اللي ما يتعملش اليوم اعمله بكره بدماغ رايقة ..
استمتع بيومك و اتهني بوقتك انت و بيتك وولادك..

اشتغل هادي و اتكلم هادي و سوق هادي .
. سيب عربية الإسعاف دي خالص ،
و اشتري راحة بالك بالهدوء و الوداعة ..

ح توصل أسرع، و تعيش أحلي،
و تخلص اللي وراك أسرع و اتقن
، و ح تحافظ علي عقلك من القلق و علي قلبك من العيا
و علي جسمك من العجز و علي عيلتك من الخلاف و الشكل ..