منتدى الفرح المسيحى - جبر الخواطر علي الله

https://upload.chjoy.com/uploads/157350651385181.jpg

"فن جبر الخواطر " ، فن جميل ، به ترسم بسمة جميلة علي وجه موجوع
، و تعطي بلسم شافي لنفس مكسورة ..

جبر الخاطر، يعني لما تلاقي واحد زعلان تروح تطيب قلبه و تقوله انت غالي علي
.. اوعي تقعد تستناه يجي لك لان كل دقيقة نزيف مشاعره بيزيد ،
و لا تروح تثبت له انه غلطان لانك بتكسر قلبه اكتر .
. اوعي تقول هو اللي غلطان و هو اللي يجي لأول،
و اوعي توعظه و لا توبخه، و كفاية عليه مرارة الدنيا ..

خليك زي المية الجميلة اللي بتروي تايه في الصحرا ،
اصل العطشان مش عاوز وعظة ، عاوز بق ميه حلو ،
و المجروح مش عاوز اللي يشخط فيه
، عاوز حصن دافي يرجع له ثقته في نفسه و في الناس الحلوة ..
ح تلاقي ضحكته عليت لفوق و ضحكتك عليت اكتر منه ..

جبر الخاطر يعني علي قد ما تقدر ما تهملش طلب حد ،
ترد علي الكل ، تسمع الكل بتواضع ..

جبر الخاطر يعني لما حد يقصدك في خدمة توريله اهتمامك الكبير
و تعتبر مشكلته هي مشكلتك.. و حتي لو مش في ايدك الحل،
ترد بلطف و تنصحه باخلاص يعمل ايه ..

جبر الخاطر يعني تحترم الطفل و تصبر عليه، و تقف للكبير و تقدر سنه و تعبه
، و توقر الناس مهما كان مستواهم..

جبر الخاطر يعني اي حد تشوفه يطلع من قدامك راضي و متراضي ..

هو صحيح "جبر الخواطر علي الله" ، بس من خلالنا انت و انا ..

الدوا رباني صحيح بس احنا اللي بناخده من ايديه و نداوي به المجروحين و المحرومين..