زوّادة اليوم: ما تتفرّج ع الأحرار ... كون إنت حرّ !

في قصّة زغيرة بتقول انّو في شب كان عم يزور مزرعة جدّو. لاحظ انّو كل قفص زغير فيه دجاجتين ما فيهن حتّى يتحرّكو بس عندن قدّامن مَي و اكل و كل همهن يعطو بيضة آخر النهار. كمّل جَولتو هالشب و شاف قسم من الدجاجات مش بالأقفاص و بيروحو و بيجو متل ما بدّن و الختيار عم يعطيهن اكل. سأل الشب جدّو اذا بدّو يساعدو حتّى يفوّت الدجاجات اللي برّا عالأقفاص. قلّو الجِدّ: لأ يا جدّي انا بفلتن قصد حتّى يشوفوهن الدجاجات اللي بالقفص و يضلّ عندن امل بالحريّة هيك ما بيتوتّرو و بيضلّو يبيضو! قدّيش حياة الناس بتشبه هالمبدأ... كتار مِنّا عايشين بالقفص عم يشوفو غيرن حرّين و بيضلّو عايشين عا امل يصيرو متلن بس ما بيعملو شي حتّى يتحرّرو و بيكتفو بالأحلام!...ما تتفرّج عالأحرار...كون انت حُرّ! ما تقبل تنحبس حرّيتك و حارب كرمالها...و ما تنسى انّو يسوع مات عالصليب حتّى يحرّرنا من العبودية...الله معكن