منتدى الفرح المسيحى - العند فعلا بيورث الكفر

https://upload.chjoy.com/uploads/156908226062551.jpg

مثل عبقرى "العند يورث الكفر" ، يعني الكفر بآراء الكل و التمسك برأيي الشخصي ..

فيه عند للدرجة دي ؟؟ ايوه ..

فيه عند جميل، طعمه مظبوط، فيه بتسمع رأي الناس و تحترمه،
لو كويس تسمعه او تاخد منه اللي يناسبك ؛
و لو مش مناسبك تفكر و تصلي تاني و تعمل اللي يناسبك انت ..

و فيه عند بيوصل لحد المرض ، يخليك علي طول ضد الناس،
مش عاوز تعمل إلا اللي في دماغك علشان ما تبانش صغير و لا غلطان لا قدام نفسك و لا قدام حد..

مثلا ، قصة "حب" بس في الحقيقة هي قصة "عند" ..
حد مش مناسب لا بالطول و بالعرض، لا السن و لا الطبع و لا العيلة و لا أصل و لا فصل ،
مجرد مشاعر ملتهبة و بس .. كل الناس شايفة انه ما ينفعش، الأهل و الأصحاب و الحكماء ..

لكن العند و سنينه !! العقل بيقفل و الشيش بينزل و الكهربا تقطع
و ما يتبقاش إلا التمسك الاعمي بالموضوع.. و الأصعب من كتر العند عاوز امشي العيلة كلها علي مزاجي ..

و بقي مطلوب من الاهل هما اللي يقولوا حاضر من غير مناقشة،
يوافقوا و يصرفوا و يكلفوا و يا ويلهم لو رفضوا ، بقوا شياطين و أعداء ..
و انقلبت الآية، و بقي العند حرية و دكتاتورية و سلاح نهدد بيه اللي يعارضنا..

طبعا ورا كل عنيد مشكلة ، و نفس تعبانة عاوزة طولة بال و حب و احتواء ..

و مرات العنيد من كتر عنده ما بيصدقش أن النار بتحرق غيره إلا لما هو نفسه يتحرق !!

العنيد دخل ماسورة مش علي مقاسه و اتحشر في اولها، و الكل حذره،
حتي عقله نبهه، لكن مصمم يكمل لغاية لما يتحشر كله ،
و بعدين يصرخ "طلعوني " أو "اكسروا الماسورة " ،
و يمكن لما يطلع منها يجرب في الماسورة اللي جنبها و بنفس مقاسها علشان "يتحشر تاني " ..

و طلع ان العند فعلا بيورث الكفر !!