زوّادة اليوم: ما في راحة وسلام إلّا مع يسوع المسيح

بيخبرو عن تنين اصحاب من هنّي و زغار عم يشكو همّن لبعضن بعد ما كل واحد كبر و كبرت مشاكلو معو. بيقلّو واحد للتاني: قولك يسوع بيكون عم يتسمّع علينا شو عم نحكي و عرف قدّيش عنّا هموم و اننا نسينا شو يعني فرح؟ جاوبو التاني: اكيد بيعرف و حتّى بدون ما يتسمّع علينا...
ايّام كتير بتعمل المستحيل حتّى ما يبيّن عليك زعلان و تنسأل ليش خصوصي انّو ما عندك جواب! مش سبب واحد...جوّاتك نار مشاكل من كل الأنواع و الأحجام و الأشكال خانقينك و ما عندك كلمات توصف اللي انت فيه... حتّى صلا ما عم تقدر تصلّي، كل ما تقعد تحكي مع ربّك بتجي الهموم بتشتِّتلك تفكيرك و بتسرح فيهن بدل ما تتأمّل بالرب! هيدي حالة كتير ناس...الزوّادة اليوم بتقلنا انّو ما في راحة و سلام إلّا مع يسوع كرمال هيك نحنا مدعوّين ما نستسلم و نوقف بوجه الصعوبات و نتّكل عا الله و نصلّي و نحكي معو، ما تقولو ما عم بقدر، ضلّو جربو! الله معكن