منتدى الفرح المسيحى

https://upload.chjoy.com/uploads/156680153882861.jpg

محتاجين جدااا نعيش الحاله دى
وهى حالة الرضا تعالوا نتكلم ببساطه ايه هى الحاله دى
وبتعمل ايه وازاى تتوجد وايه اسباب عدم تواجدها .
ايه هى حاله الرضا :
- حالة الرضا فى ابسط كلمتين هى الشخص الراضى بحاله
الشخص اللى عارف وفاهم وعايش ان كله للخير
- حاله الرضا هى حالة تسليم واتكال
وتعايش مع كل مجريات الحياه بمبدأ ان الله يصنع كل ماهو مناسب فالحين الحسن
بتعمل ايه حالة الرضا دى :
- اول حاجه بتشوفها فالانسان الراضى انه بشوش ،
ولا يمكن هتشوف انسان راضى مكشر الحاله دى كدا . طبيعتها كدا .
- حالة الرضا توأمه لحالة الشكر الانسان الراضى شاكر دايما .
- حالة الرضا دى بتكسب صاحبها راحه البال
و بتحمى من صراعات نفسيه مؤذيه جدااا .
- حالة الرضا دى بتمتعك او بمعنى تانى بتخليك تعيش سعيد ومش انت بس انت وكل اللى حواليك والقريبين منك .
- حالة الرضا بتخلق جواك حاجه كدا زى الاكتفاء
يعنى ببساطه بتحس انك مش ناقصك حاجه او محتاج لحاجه .

طيب تتوجد ازاى ؟
- علشان تبقى انسان راضى فلازم تكون انسان شبعان
والشبع هنا مش شبع جسدى اطلاقاً
فالعين لا تشبع من النظر والاذان لا تمتلئ من السمع
وانما الشبع بربنا و شبع حقيقى مش كلام
- علشان تتوجد حالة الرضا لازم تشوف
وتبص على اللى حواليك مثلاً جرب وطى براسك
لتحت هاتشوف الاقل منك وراسك هاتوجعك من التوطيه
طب ارفع راسك لفوق هاتشوف الاعلى منك
وراسك هاتتعب وانت معلقها لفوق طب خلى راسك
فى وضعها الطبيعى هاترتاح حتى رقبتك
مش هاتوجعك وده يخليك تعرف ان احسن وضع هو اللى انت فيه
- حالة الرضا هاتتوجد لما تقدر النعم اللى عندك ومش المال والشقه والعربيه هى دى النعم ياما ناس تمتلك كل ده
وعايشين متذمرين وتعبانين ومفتقدين ابسط حاجات
. لكن فى نعم تانيه تخليك راضى وجدا زى الصحه
وجود الاب والام او وجود اولاد او زوجه او زوج
او محبه اصدقاء كل دى نعم وجودها
كفايه يخليك تعيش حالة الرضا وتعيشها اوى .
- حالة الرضى هاتتوجد لما تقول فلنشكر صانع الخيرات
من قلبك وانت بتفتكر الستر والمعونه وانك موجود لدلوقتى .

اسباب عدم توجد حالة الرضا
- الاسباب اساسها من الداخل مش الخارج القلب الاساس .
الغنى الداخلى مش الخارجى
(لقمه يابسه ومعها سلامه خير من بيت ملآن ذبائح مع خصام ) .
- عدو حالة الرضا الاول النظرة للغير النظره فى رزقه
او بيته او اى شيئ يملكه .
- عدم الشكر وتقليل اهميه عطايا ربنا
اللى يوميا عايشين بيها وفيها ومنها
- انعدم حالة الرضا مع المتذمرين والنسايين اللى بينسوا
ربنا عمل معاهم ايه ولسه بيعمل .

تدريبات للوصول لحالة الرضا :
- دايماً وابداً افتكر احسانات ربنا
- دايماً احط قدامى الاقل منى ان كان مريض او فقير
او مفتقد حاجات عندى
- دايماً واخيراً اثق اؤمن بترتيبات ربنا وافهم كويس
ان تقسيمه عادل ورحيم واعرف ان ف ايديه
كل الأمر ان حب واراد التغيير هايغيير .
وفى الاخر احب اقول
لما تكون راضى باللى ربنا بعتهولك
هايبعتلك اكتر ويزودهولك
اشكر ربنا على كل حال ..
ربنا يدينا كلنا نكون راضيين
وعايشين حالة الرضا